Tuusi: Oqalliseriaaseq tujorminarpallaarpoq
- Inuttaq pineqarpallaalertarami. Anguniagaq tunullugu imminut akerlereerujussuartutut, oqaatsit ilaanni sakkortuut inatsisiliortunut tulluanngitsut atorlugilluunniit oqallisileraangamik, isumaga malillugu ukiuni kingullerni oqalliseriaaseq, tujorminartutulluunniit oqaatigineqarsinnaasunngorlugu ingerlanneqaqqajaavallaalersimaqaaq.
Tamannalu sivitsorsaataasartoq Inatsisartut siulittaasuata oqaatigaa:
- Oqallisigisaq qimarujussuarlugu allanut sangoqattaartarneq takornartaanngimmat, taanna ilaannikkut sivitsorsaataarujussuartarpoq.
TV-kkullu toqqaannartumik aallakaatinneqartalernikuunerat tassunga sunniuteqarsimasoraa:
- Qinikkatut tusarneqarnissarput takuneqarnissarput, taanna tassa uagutsinnut takoqqusaarutitut atorsinnaavarput, aamma atortarparput. Aallakaatitsisarneq maanaannaq kipisarallarmat, aallakaatitsineq unikkaangat taava inatsisartuni oqallineq tassanngaannaq sukkatserujussuartarpoq. Kisianni toqqaannartumik aallakaatitsineq ingerlatillugu oqalukkusunneq annertunerusoq malunnartarpoq.
Inatsisartut siulittaasoqarfiani ilaasortaq, Per Berthelsen Josef Motzfeldt ilaatigut isumaqatigisinnaavaa. Taamaattorli ataatsimiinnerni oqallittariaaseq ukiut siulianut naleqqiullugu ajorseriarsimasorinngilaa, isumaqarporlu oqallittariaaseq allanngortikkuminaassasoq:
- Politikki, aap, isumaqatigiinninniarfiuvoq. Kisianni aamma akersuuffiusarpoq. Amerlanerussuteqarnerlu, oqarlanga, ingasaassilluni atorneqaleraangat, tupinnanngilluinnartarpoq ikinnerussuteqartut erloqerpaluttumik ilaatigut nipeqartumut oqalulersinnaagaangata. Tamannalu allanngorunnanngilaq.
Per Berthelsenillu Inatsisartut ataatsimiinnerinit toqqaannartumik TV-kkut aallakaatitsisalernerup sunniuteqarnera aamma malugaa:
- Qularnanngitsumik soorunami ilaannut annertuumik sunniuteqarpoq oqaaseqarnerit aallakaatinneqartarnerat. Taamaattumillu immaqa ilaatigut aamma tamaviaarneq tassani sakkortunerusarpoq. Soorluli aamma arsaattartut nunarsuaq tamakkerlugu aallakaatinneqartumi arsaannermi peqataagaangamik qularnanngitsumik aamma...immaqa allaat piginnanertik sinnerluguluunniit tamaviaarniarsarisarput, avammut takutitsilluarnissaq anguniarlugu. Politikki tassuuna allaanerunngilaq, Per Berthelsen oqarpoq.
