Tuttuutillit eqqugaapput

Nunarsuarmi aningaasarsiornikkut ajornartoorneq suli nunatsinnut annertunerusumik sunniuteqanngikkaluartoq, kujataani tuttuutillit eqqorneqarput.
Allattoq Najaaraq Egede
oktobarip 24-at 2008 17:02

Tuttut neqaat 17 tonsit Islandimiunit pisiarineqartussaagaluit massakkut Københavnimi uninngaannarput.

Isortumi tuttuutillit tuttut neqaanik Canadamut, Sverigemut, Islandimut nunatsinnilu pisiarineqarsinnaasunik tunisassiortarput.

Neqit tunisassiarineqartut Isortumi toqoraaveeqqami, nunani tamalaani akuerineqarsimasumi suliarineqartarput, pisisussanullu ingerlateqqinneqartarlutik.

Tuttut neqaat 17 tonsit Islandimi pisisussanut ingerlanneqaraluarput, Islandimili aningaasasarsiornikkut ajornartoorneq pissutaalluni Islandimi aningaasaq naleerulluinnarmat, nunanut allanut pisiniarneq ilaatigut akissaarunneqartalersimavoq.

Nassiussat massakkut København-imiit ingerlariaqqissinnaajunnaarsimapput, sumullu tunineqarsinnaaneri massakkut misissuiffigineqartoq, Isortumi tuttuuteqarfimmeersoq Lone Nielsen oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq