Tuttut umimmaallu ullumi piniagaalerput.
Tuttunniarnissamut umimmanniarnissamullu piumasaqaatit ukioq kingulleq piniarnermut piumasaqaataatit assigissagaat naalakkersuisut aalajangerput. Tuttunniarneq umimmanniarnerlu aggustip aallaqqaataani aallartikkaluartoq, ataasiakkaanik naleqqussaasoqarpoq.
Nunap immikkoortuini siornatigut tuttoqarfiulluartutut ilisimasani Ameralimmi Qeqertarsuatsiaanilu tuttoqatigiit annertuumik ikileriarsimasut misissuisimanerit takutimmassuk, Avatangiisinut Pinngortitamullu Pisortaqarfiup aalajangerpaa, sumiiffinni taakkunani aggustip 15-ianniit septembarip naaneranut tuttunniarneq atuuttussanngortinneqassasoq. Siorna 2006-imi tuttunniarneq aggustip aallaqqaataaniit ingerlanneqarpoq.
Nunap immikkoortuisa sinnerini najoqqutassat kommuninut paasiniaanikkut pissarsiarineqarsinnaapput.
Akuersissuteqarluni piniarnermi pisassat amerlassutsikkut qummut killilerneqanngikkaluartut taamaattoq piniarsinnaanermut akuersissutinik pigisaqartut aamma tamarmik tuttunik umimmannillu pisaqarsinnaanermut akuersissutinik peqqaarlutik piniarneq ingerlattassavaat. Taamaattumik inuussutissarsiutigalugu piniartut aammalu saniatigooralugu piniartartut kommunerisaminnik saaffiginninnikkut akuersissutinik piniaqqaartassapput.
Tuttullu pisarineqartut tamarmik immikkut nalunaarsuiffik immersorlugu nalunaarutigineqartassapput, tamannalu kommunimut tunniunneqareersimassalluni piniarnerup uninneraniit sapaatit-akunneri pingasut qaangiutsinnagit.
2006-imi pisarineqartunik immikkut nalunaarsuiffik atorlugu nalunaaruteqarsimaneq siorna pisarineqartut 20 procentiinnaanik amerlassuseqarsimapput.
