Tuttut piniapilunneqanngillat
Pingasunngornermi ullaakkut radioaviseqarnitsinni Niaqornani piniartoq Hans Kruse oqarpoq, Nuussuarmi Uummannap kujataatungaani tuttut ikiliartortut tamatumunngalu pissutaasoq ukioq naallugu piniarneqartalersimanerat.
- Tuttuttassat amerlassusaat nakkutigineqarput, aamma ukioq kaajallallugu piniarneqarsinnaasanngillat. Aggustip aallaqqaataaniit februaarip naggataanut piniarneqartarput. Uummannap kommunia ammaassisimanerarlugu oqalunneq aamma eqqunngilaq, akuersisartummi tassaapput Namminersornerullutik Oqartussat, Jens-Lars Fleischer nassuiaavoq.
Hans Krusep uparuaanermini aamma oqaatigaa qamuteralaat atorlugit ukiukkut piniarneqartalernerat nungusaanermut pissutaaqataasoq.
- Tamanna aamma eqqunngilaq. Uummannap Kommunea immikkut ittumik qamuteralaat atorlugit tuttunniarsinnaanermik akuersinngilaq. Inuit ataasiakkaat Namminersornerullutik Oqartussanut qinnuteqartut kisimik akuerisaanikuupput, soorunami sakkortuumik killilersuinertalimmik, Jens-Lars Fleischer naggasiivoq.
