Tuttut kisinneqassasut
Kisitsineq kingulleq ukiut arfinillit matuma siorna pivoq, tuttunillu kisitsinissaaq maannakkut piffissanngorpoq.
Kisitsineq pisassiissutigineqartussat aalajangerneqarnissamut pingaaruteqartoq, Sisimiuni piniarnermik nakkutilliisoq, Hans Mølgaard, Nuup kujataani kisitsinermi peqataasussaq oqarpoq.
Tama akuttutigisumik kisitsisoqaraangaat nunataq qanoq amerlatigisunik tuttoqarnersoq nalornissutigineqartartoq, tamatumalu kingunerisarpaa taamungaannaq tuttutassanik pisassiisoqartariaqartarluni, Hans Mølgaard oqarpoq.
Ukiuni kisitsiffiunngitsuni piniartut pisanik nalunaarutaat aallaavigalugit Naalakkersuisut tuttutassiisarput. Piniarnermut allagartami tuttu sumi pisarineqarsimanerata nalunaarutiginissaa pingaaruteqarpoq.
Piniarnermut allagaqartaq tiguneqaraangat tassunga ilanngunneqartarpoq tuttut pisarineqartartut sumi aamma qassit pisarineqarnersut nalunaarsussallugit, tassuuna tuttunik pisaqartut pisussaaffilerneqartarput nalunaaruteqarnissaminnnut, Hans Mølgaard oqarpoq.
Qulimiguulimmik kisitisisoqartarpoq, helikopteri akunnermut 65 kilometerinik sukkatigisumik 50 meterit missaannik qutsississulimmi ingerlaartarluni.
Hans Mølgaard tuttunik kisitsinermik misilittaqarluartuuvoq.
Tuttunik kisitsineq silagilluinnartumi ingerlanniarneqartarpoq, suna tamarmi qanittoq arajutsineqarsinnaani, Hans Mølgaard oqarpoq, ilaanni kilometerit affaa missiliorlugu ungatsitigisoq takuneqarsinnaasarluni.
Helikopterimik kisitsisarnerup uppernassusia piniartut ilaannnit apeqqusernerneqartarpoq.
- Tamanna tupinnanngilaq, kinaluunniit taamatut eqqarsariarsinnaatitaavoq, Hans Mølgaard oqarpoq. Taassuma erseqqissarpaa sapinngisamik kisitsineq ajunnginnerpaamik ingerlanniarneqartartoq. Kisitseriaatsimik ilikkarsimasut naapertorlugit ullumikkut kisitseriaaseq ajornerunerpaaffeqanngitsoq, Hans Mølgaard oqarpoq.
Nuup Kangerluaniit kujammut Sioraq tikilugu tuttunik kisitsineq ulluni arfinilinni pissasoq, piniarnemut nakkutilliisup, Hans Mølgaardip naatsorsuutigaa.
