Tuttut Canadami ikiliartortut
Canadami tuttut sumiiffinni arlalinni sukkasuumik ikiliartorput. Nunavummi naalakkersuisut una qaammat nalunaarutigaat, Baffinip qeqertaata avannaatungaani tuttu 350-it kiserngorussimasut, taamaalillutik nungutaanissamut ulorianartorsiulerlutik.
Aamma atuaruk Canadami tuttut ulorianartorsiorput
Tamannarpiaq aamma Canadami sumiiffimmi allani pivoq. Provinsimi Albertami tuttoqatigiit arlaliupput. Tuttoqatigiit Little Smokymik taaguutillit maanna 70-t 80-illu akornaniiginnalersimapput. Peqqutaasulli ilaat ataaseq tassaavoq, tuttut nerisarfiisa nunataata annertussusaa 5 procentiinnanngorsimanera. Nunatalli sinneri aqqusinniornernut, misissuiffittut, orpippassuaqarfittut allanullu atorneqarput.
Taamatut ittoqarnerata tuttunut neriniarnernut ajornartitsiinnarani aamma amaqqunut ajornannginnerulersimavoq tuttut piniagarinissaannut. Albertami naalakkersuisut tuttut nungukkiartornerat annaanniarlugu 2005-miilli ukiumut amaqqut 100-ut aallaallugit toquttarpaat.
