Tuttut aalisakkallu isumannaarneqaqqaassapput

London Mining Isukasiani 2015-imi saviminissamik piiaalluni aallartissaaq, taamali pisoqalersinnagu siunnersuisarfittut suliffeqarfik Grontmij Carl Bro tuttut aalisakkallu ajoquserneqaratik qanoq aatsitassarsiorfimmit aniguisinnaanerannik misissueqqissaassaaq.

Tassami aatsitassarsiorfik atorneqartussaq aaffarmiittussaassaaq. Taamaattumillu siunnersuisarfiup inuit avatangiisillu qanoq sunnerneqarnissaannik naliliineq London Miningip atugassaa suliarissavaa, taassuma misissueqqissaarnerit Naalakkersuisut akuersissuteqarnissaannut atussammagit, Ingeniøren allappoq.

- Pineqartoq tamarmi tassaavoq pitsaanngitsumik sunniutaasinnaasut suujunnaarsillugilluunniit annikinnerpaanngortinniaratsigik, tassami aatsitassarsiorfik taama annertutigisoq arlaatigullu sunniuteqanngitsoq pilersinneqarsinnaanngilluinnarmat, kemimut tunngasunik immikkut ilisimasalik siunnersuisartorlu Tanja Nielsen Grontmij Carl Bromeersoq Ingeniørenimut oqarpoq nangillunilu:

- Manna tikillugu avatangiisit imatorsuaq ajornartorsiutaanngitsut misissuinitta paasinarsisippaa, kisiannili aatsitassarsiorfimmik ilusilersuisut innuttaasullu oqaloqatigiuarnissaat pingaaruteqarpoq sunniutissat qanoq iliorluta annikinnerpaanngortinniarnissaat paasiniarlugu, Tanja Nielsen oqarpoq ilaatigullu oqaatigalugu, pujoralannik katersuissutit ikkussorneqarsinnaasut pujoralallu saviminissarsiorfimminngaanneersoq siaruaatinnginniassammat imermik tissaluttaatit atorneqarsinnaasut. Aammattaaq tuttut tamaani angalaarpallaannginnissaat isumagineqarsinnaavoq.

Naliliinermik suliassaq 2011-p naaneranut ingerlanneqassaaq. Aatsitassarsiorfiup tassungalu atasunik atortulersuutit attaveqaatillu piareersarneqarniviat ukiuni 2012-imiit 2014-imut ingerlanneqartussatut naatsorsuutigineqarpoq.

Akuersissutit tamarmik pissarsiarineqarpata aatsitassarsiorfik 2015-ip ingerlanerani aallartissaaq.