Tuttut 300-t sinnillit ipisimasut

Tuttut 300-nit amerlanerit toqungasut Nunavimmi Kuujjuup kuuani tissukartut sapaatip akunnerani kingullermi nassaarineqarput.
Allattoq Elisa Isaksen
oktobarip 16-at 2007 07:43

Tamaani piniarnermut nakkutilliisoq, Valley Saunders, nutaarsiassaqartitsivimmut CBC-mut oqarpoq, tuttut ingerlaartillutik Limestonep qorlortorsuinut, Kuujjuup kujasississuaniit 150 kilometerinik ungasitsigisumiittumi, nakkarlutik ipisimassasut ilimagineqartoq.

Tuttut 10.000-it missaanniittut qorlortorsuarni taakkunanerpiaq ipillutik 1984-imi aamma ajunaarput. Nutaarsiassaq taanna nunarsuaq tamakkerlugu taamani malinnaavigineqarpoq.

Tuttorpassuit taamani toqorarmata qorlortorsuit kujataatungaanni ungaluliortoqarpoq, tuttut amerlasoorsuakkaarlutik ingerlaarnerminni tamaannaqqukkaangamik nakkariataarsinnaanerat pinngitsoorniarlugu.

Tuttulli kingulliit toqusut kitaaniit ingerlaartuusimapput, tamaanilu oqartussaasut allanik aamma ungaluliortitilereerput, tuttut amerlanerusut nakkarlutik toqunissaat pinngitsoortinniarlugu.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq