Tuttup neqaa peqqinnarnerujussuuvoq
Tuttup neqaata peqqinnartuunera norskit nerisassat pillugit immikkut ilisimasalittaasa misissuiffigeqqammerpaat.
Tuttup neqaa allanut naleqqiullugu tunnukinneruinnanngilaq aammali vitamininik inuussutissanillu ulikkaartoq misissuisut uppernarsarpaat.
Tamannalu peqquteqartinneqarpoq tuttut nunap timaani inuilaarsuarmi uumasuummata taamalu timaat aalajuaannarlutillu paarnanik, orsuaasanik, paarnaqutinik naasunillu nerisaqartuunerat, taama norskit ilisimatuuisa nittartagaanni allaaserinnittoqarpoq.
Tamanna tunngavigalugu norgimiut peqqinnissaqarfiata tuttut neqaasa peqqinnarnerat suli aammalu ilisimatusarfigeqqikkusulerpaat, ilaatigut misissorniarneqalersaarpoq Norgemi atuisartut qanoq ilillugit tuttup neqaanik nutaamik tuniniaavigineqarnerulersinnaanerat.
Ilisimatusarnikkut misissuilersaarneq tamanna Norskit New Zealandimiullu ilisimatuuisa akornanni pissasoq erseqqissaatigineqarpoq, taakkulu nunat tassaapput nunarsuaq tamakkerlugu neqinik nunap timaaneersunik avammut tuniniaanerpaasartut.
