Tusilartut ukiumoortumik ataatsimoortinneqartarnerat sipaarniarfigaat
Agathe Fontainip, Inuit Ataqatigiinneersup naalakkersuisunut apeqquteqaammini ukiumoortumik naapeqatigiittarnerup pingaaruteqarnera erseqqissarpaa, tassami naapeqatigiinnerni tusilartut ilaqutaat ussersornermik atuisinnaanermik pikkorissarneqartarmata.
Naalakkersuisut akissumminni oqaatigaat, tusilartut ilaqutaasalu ukiumut ulluni tallimani arfinilinniluunniit ataatsimoortinneqarnerat, ikinnerpaamik 800.000 koruuninik akeqassasoq, ullumikkullu tamanna akissaqartinneqanngitsoq.
Naalakkersuisut aamma isumaqarput, tusilartut ukiumoortumik ataatsimoortinneqartarpata, taava allatut innarluutillit taamatut periarfissinneqarnissaminnik aamma piumasaqalissasut. Tamatumunnga taarsiullugu naalakkersuisunut ilaasortap Naja Petersenip Agathe Fontainimut akissuteqaammini tusilartut akunnerminni qarasaasiatigut attaveqaatigisinnaasaannik pilersitsisoqarsinnaanera suliniutigineqartoq oqaatigaa.
