Tusilartut atugaat pitsanngorsalerpaat

Nunatsinni tusilartut atugarisaat assigiinngitsutigut pitsanngorsarniarneqarput. Meeqqat tusilartut angerlarsimaffitsik qimannagu ungasissumiit atuartinneqarnissaat pingaarnertut suliniutigineqarpoq.

Ilaqutariinnermut pisortaqarfimmi paaqqinnittarfinnik, ulloq unnuarlu ingerlanneqartunik, nakkutiginnittut pisortaat Gitte Jul ima oqaluttuarpoq:

- Nunatsinni tusilartut eqqartugaatsiarsimavugut. Maannamut aaqqissuussaaneq atuinnassanerlugu allanngortissinnaanerluguluunniit eqqartuivugut. Meeqqat Sisimiuni tusilartut atuarfiannut angajoqqaatik qimallugit atuariartortarput. Meeqqanut ikiorsiissutissanik misissuisimavugut; teknikkikkut atortorissaarutit atorlugit atuartitsisoqarsinnaanersoq misissuisimavugut. Meeqqat siutileritillutik ikiorserneqarsinnaaneri aamma misissuiffigisimavarput. Taakku atorluarnerisigut meeqqat angajoqqaatik najorlugit illoqarfigisaminni atuartinneqarnissaat aalajangiupparput, Gitte Jul oqarpoq.

Meeqqat tusilartut ungasissumiit atuartinneqartalernissaat sulissutigineqarpoq ilaqutariillu tusilartortallit siunnersortimik tapersersorteqalernissaat sulissutigineqarluni. Isiginnaarutikkut ussersorluni oqaluussinermik ilinniartitsineq atuartitsinermut ilaatinneqassaaq.

- Tusilartut siunnersortaat illoqarfinnut ataasiakkaanut angalatinneqartassaaq. Tusilartut ukiumut ataasiarlutik naapittarneri aaqqissueqataaffigisassavagut. Taamatut naapinnerni ussersorluni oqaluusserinerit ilinniartitsissutigineqartarput, Gitte Jul oqarpoq.

Taanna aperaarput tamanna tusilartut kiserliornerulernerannit kinguneqassannginnersoq, imalu akivoq:

- Danmarkimi meeqqat tusilartut sullinnerini misilittakkakka naapertorlugit akissavakkit; meeqqat qarasaasiaq atorlugu attaveqartarput taamaalillutillu avatangiisiminnut attaveqartarlutik. Tamanna nunatsinni aamma atorluarneqalerpat kingunipilutitsisoqarnissaa ilimaginngilara, Gitte Jul naggasiivoq.

Ungasissumiit atuartitsisarnerit tusilartunillu siunnersortit angalatinneqartarnerisigut kiffartuussineq ussersorlunilu oqaloqateqarsinnaaneq pikkorissaaffigineqartuarsinnaasut aamma Gitte Jul-ip erseqqissaatigaa.