Tusilartoq sulilerusukkaluarpoq
55-nik ukiulik Karen Qvist pingasunik ukioqarluni menigitissernermi kingorna tutsarluttunngorpoq, ullumikkulli tusaasaarulluinnarsimalluni.
Karen Qvist ilanngutassiornitsinni attavigaarput, inooqataalu Loth Sørensen ussersorluni oqaloqatiginnissinnaammat taanna nutserisoralugu ilanngutassiorsinnaasimavugut, taamaalilluta Luutsip nipaa atorlugu Karenip isumaa ilanngutassiaralutigu.
- Sulisinnaavunga, sulisinnaagaluarpunga kisianni inuit allat attaveqarfiginiarnerat ajornartarpoq, tassami tusaasaarutiivinnikuugama inuit oqalunneri paasisinnaajunnaavikkakkit, Karen Qvist ussersorluni taama nalunaarpoq.
Karen Danmarkimi peroriartorpoq tusilartullu atuarfianni ussersorneq ilinniarlugu. Kingorna Teknisk skolemi qalipaasutut ilinniarpoq, naartuleramili qalipaasuunini unitsippaa qalipaatit akuisa sunniutigisinnaasai pinaveersimatikkumallugit, taamalu Kalaallit Nunaannut nuukkami
1979-imi Sisimiuni najugaqarlerpoq, taavanilu tusilartut atuarfianni ussersornermik ilinniartitsisutut sulilluni.
Tusilartulli atuarfiat matummat atuartitsisarnini unitsittariaqalerpaa, kommunemullu siusinaarnersiuteqalernissi qinnutigisariaqalerlugu. Karenip oqarnera naapertorlugu inuusunnerugallarami siusinnaarluni soraarnerussutisiaqarnissaq orniginartuutinngilaa kanngunartutut misigisaramiuk.
- Siusinaartumik soraarnerussutisiaqarnissaq nuannarinngikkaluarpara suliffissaqannginnamali allatut ajornaqaaq, oqarpoq.
Karen Qvist siusinaartumik soraarnerussutisiaqalernissaminut taarsiullugu sulilerusukkaluarpoq, tusilartut atuarfianeeqatigisarsimasani inuusuttut meeqqallu maqaasinerarpai. Isumaqarnerarporlu Kalaallit Nunaanni tusilartut atuartinneqarluinnartariaqaraluartut aammalu sulisinneqarsinnaasariaqaraluartut.
Karen Qvistip kommunemi tusilartunut siunnersortimik tusilartunullu nutserussisinnaasumik atorfinititsisoqarnissaa kissaatiginartuutippaa. Taamalu aamma siunnersuutigaa, tusilartut ukiumoortumik naapitinneqartarsimagaluarnerat kingumut aaqqissoqqinneqartariaqaraluartoq.
