Tusassip pisiniarfini pingasut matulerai

Tusassip illoqarfinni pingasuni: Aasianni, Qaqortumi Maniitsumilu pisiniarfiutini matulerpai. Tamanna pisiniartartukinneranik, allakkat ikinneruneranik digitalinngorsaasoqarneruneranillu pissuteqarpoq.

Allattoq Nicole Sander Bertelsen

apriilip 14-at 2025 10:52

Nutserisoq Connie Fontain

Tusassip pisiniarfiinukarluni ikiorneqarsinnaaneq Nuummi, Sisimiuni Ilulissanilu innuttaasunut taamaallaat periarfissaalissaaq.

Tusassimmi pisiniarfimminit arfinilinnit illoqarfinni pingasuni matusariaqarlugit, tusagassiuutinut nalunaarummi allappoq.

- Pisiniarfinnik matusinerput sullitatsinnut, ukiorpassuarni uagutsinnut qanimut saaffiginnittarnerminnik sungiusimannittunut allannguuterujussuunera nalunngilarput. Nunarsuarli sullitattalu atueriaasiat allanngormata tulluussartariaqarpugut, Niuernermi Pisortaq Nikolaj Christoffersen nassuiaavoq

Tusassip pisiniarfiinik matusineq

Tusassip pisiniarfiit Maniitsumi ulloq 23. maaji, Qaqortumi ulloq 25. juuli Aasiannilu 17. oktobari matussapput. Tamatuma kingorna sullitavut allakkanik nassiussinissamut aallernissamullu Qaqortumi, Maniitsumilu Brugsenimi imaluunniit Aasianni Pilersuisumi ikiorneqartalissapput, soorluttaaq SIM-kortinik modeminillu aamma Pilersuisumi, Brugsenimilu tunineqartalissasut.
Internetimik mobiilimillu atuisuuffinnik isumaginninnerit imminut kiffartuunnikkut Nuummilu Sullissivimmit ikiorneqarnikkut ingerlanneqartalissapput.

Atuisartut atueriaasiata allanngorsimanerata saniatigut allakkat ikileriangaatsiarsimasut tusagassiuutinut nalunaarummi allassimavoq. Tamanna pissutigalugu piniarfinnut isertartut atukkunerulerlutillu amerlanerusut digitalikkut aaqqiissutinik imminullu sullississutinik atuinerulersimapput.

Matusinerit nutaanillu suleqateqalernerit

Naak Tusassip pisiniarfii matugaluartut tamanna suleqatigiinnernik nutaanik ammaavoq, taamaaliornikkummi Aasianni, Qaqortumi Maniitsumilu allakkanik aallertarfeqarnissaq, atuisunullu SIM-kortinik modeminillu tunniussivigineqartarnissaat suli periarfissaalluni.

Tusassimmi najukkani pisiniarfiit soorlu Pilersuisoq Brugsenilu nutaamik suleqatigiissuteqarfigai.

Taamaalillutik pisiniarfimmukaraangavit nillataartitsiviit oqarasuaatillu immertarsinnaavatit. Tusassip pisiniarfinnik matusinerit ajortutut isiginngilai.

- Siusinnerusukkut pisiniarfinnik matusinitsitta kingunerisaanik sullitatta pisiniarfimmik suleqateqalernitsinnik qujamasuutiginninnerat – pingaartumik ammasarfiit eqaannerulernerannik qujamasuutiginninnerat misilittagaqarfigaarput, tusagassiuutinut nalunaarummi allassimavoq.

Pisiniarfiit ikinneruleraluartut anginerulissasut

Pisiniarfinnik matusisoqaraluartoq pisiniarfiit sinnerini pingasuni – pingaartumik Nuummi pisiniarfik allilerneqassaaq. Atuisunut Sullissiviup atuisunut kiffartuussinerit allakkanik isumaginninnerit kattunneqassallutik. Tamanna atuisunut tamanut – aamma Nuup avataaniittunut iluaqutissartaqarpoq.

- Periusissiatta pingaarutilittut ilaatut Nuummi Sullissivittaassami nukiit kattutissavavut, tassani sullitatta poortugaataanik, atuisuuffiinik digitalikkullu aaqqiissutaannik ikiorsinnaavavut. Tamannalu innuttaasunut iluaqutaavoq – aamma Nuup avataaniittunut. Ilaatigut suleqatigiit ikiorsiisartut tunniusimasut nuna tamakkerlugu oqarasuaatikkut qarasaasiakkullu ataatsimiinnerit aqqutigalugit sullitatsinnik ikiuinissaminnut piareersimapput, Nikolaj Christoffersen nassuiaavoq.

Sullissivik nutaaq 2025-mi ukiakkut piareernissaa naatsorsuutigineqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.