Tusassimi pisortaq soraarluni Savalimmiunut angerlarluni 2024-p aallartinnerani nuussasoq
Kristian Reinert Davidsen Tusassimi ukiuni arfineq-pingasuni pisortaareersorlu Tusass nutaamik pisortassarsiortussanngorpoq.
Taassuma savalimmiormiut attaveqaatinut suliffeqarfianni Føroya Telemi pisortaanertut atorfimmik neqeroorfigineqarnini akueriniarlugu toqqarsimavaa.
Tusass tusagassiuutinut nalunaarummi allappoq.
Kristian Reinert Davidsen Savalimmiuneersuuvoq, taamaammallu ilaquttami najornerat atorfeqarninilu iluamik ataqatigiissilluarsinnaalissavai.
Digitalikkut inerisaaneq sukkatsikkaa
Tusassimi siulersuisut siulittaasuata, Ulrik Blidorfip pisortarisimasartik suliaanut nunatsinnilu digitalikkut inerisaanikkut suliaqarneranut qujassuteqarfigaa.
- Kristian Reinert Davidsenip siuttuuffigisaanik pitsaasumik aqutsilluartoqarsimaneratigut ineriartorluarsimavoq Nunatsinnilu digitalikkut inerisaaneq sukkatsisarsimallugu, taanna oqarpoq.
Pisortatut soraarniuteqartoq attaveqaatinut suliffeqarfiup nunatsinni tamarmi teknologiit 4G aamma 5G, kiisalu imaatigut kabeli, sakkortusaaviit qaammataasakkullu attaviit nuna tamakkerlugu ingerlanneqalerneranni siuttuusoq, siulersuisut siulittaasuat tusagassiuutinut nalunaarummi allappoq.
Nunatsinnut qujasoq
- Ataatsimoorluta angusagut pillugit tulluusimaarpunga, Kristian Reinert Davidsen oqarpoq.
Siulersuisut maanna pisortaanermik nutaamik Kristian Reinert Davidsen aappaagu ukiup sisamararterutaani siullermi soraarpat atorfinittussamik ujaasisussanngorput. Nutaamik qaqugu atorfinittoqassanersoq suliffeqarfiup suli naluaa.
