Tusass pisortartaartoq: - Pingaarutilittut inissisimavugut

Tusassimi pisortaanerusimasoq Toke Binzer atorfimminit siorna soraarpoq.

Royal Greenlandimi pisortatut atorfimmut nuunneranik tamanna pissuteqarpoq.

Tusass aqutsinermut pisortamik nutaamik toqqaalluni tusagassiuutinut nalunaarummi oqaluttuarput.

Jonas Hasselriis suliffeqarfimmik aqutsinermik maannamiit suliaqartussanngorpoq.

Toke Binzerip decembarip aallaqqaataani soraarnerata kingorna pisortaanerugallartutut atorfeqarnermi saniatigut Tusassimi sulingaatsiareerpoq.

Tusagassiuutinut nalunaarummi taama oqaluttuarpoq, siulittaasorlu Bodil Marie Damgaard qujaffigalugu.

- Siulittaasoq siulersuisullu qujaffigerusuppakka, suliffeqarfimmut Tusassimut  maanna ukiuni 20-ni suliffigisannut tatiginnillutik akisussaasunngortikkaminnga. 

Piffissaq pingaaruteqartoq

Bodil Marie Damgaard oqaluttuarpoq pisortatut qinnuteqartorpassuit akornanni 12-it pisortassatut piukkunneqarsimasut, Jonas Hasselriisilu suliffeqarfimmi misilittagaqarnerpaammat toqqarneqartoq.

-Pisortaanerugallarnermini, eqqissiviilliorfioqisup nalaani, suliani pitsaasumik tamanit iluarineqarlutik naammassisarpai.  Suliffeqarfimmi sulisut ineriartortinneqarnerisa piginnaanngorsarnerisalu takussutissat ilagaat, tamannalu neriunaateqarluarnartorujussuartut isigaara. 

Tamannalu pisortanngorlaamit ilalerneqarpoq suliffeqarfiup nalaataa tassaanerarlugu piffiusoq nalinginnaanngitsoq. 

- Tusassip piffissaq nalaataa tassaavoq pingaarutilerujussuaq, allannguisoqartorujussuussallunilu suliassarpassuaqalersussaq, Jonas Hasselriis oqaluttuarpoq nangillunilu: 

- Suliassariligara maniguuteqqissaarlunga sulisut pikkorissut suleqatigalugit naammassiniassavara.