Tusarniaasarnerit sammilerpaat

Suliffeqarfissuit Nunatsinni aatsitassarsiornermik, uuliamik gassimillu pilersaarusiaannut tunngasunut tusarniaanerni inuiaqatigiit peqataatinneqartarnerat naammaginartumik pisarpa? Sulisitsisut Peqatigiiffiata, GA-p, nalunaarusiaata tamanut ammasumik Katuami ullumi pisussami avammut nalunaarutiginerani apeqqutit tamakku ilaatigut akissutissarsiffigineqarsinnaapput.
Allattoq Apollo Jeremiassen
februaarip 16-at 2012 07:08

Cand. scient. pol. Sara Bjørn Aaen, GA-mi ineriariartortitsinermut siunersortaasoq, nalunaarusiorsimavoq suliffeqarfissuit pilersaarusiornerannut atatillugu tusarniaatitsinerni inuiaqatigiit oqartussaaqataanerat periarfissinneqartarsimanersoq, naammaginartumillu pisarsimanersoq.

Sara Bjørn Aaenip misissuinermini suliniutit pingasut piviusunngorsinnaasut aallaavigisimavai, tassalu Cairn Energyp uuliamik ujarlerlutik qillerinerat, Greenland Minerals and Energyp Kujataani Kuannersuarni aatsitassanik misissuinerat taavalu Alcoap aluminiummimik aatsitsiviliulersaarnera.

Nalunaarusiap taassuma saqqummiunneqarnerani, Folketingip ombudsmanderisimasaa, Hans Gammeltoft-Hansen, oqalugiarluni aamma saqqummiissaaq, oqalugiutigalugu 'Inuiaqatigiinni angisuuni mikisunilu ammasumik ingerlatsineq'.

Saqqummiinerit taakku marluk aallartissapput ullumi nalunaaqutaq marlunut, Katuami tamanna pissalluni.

Saqqummiisoqareerpat tusarnaariat akornanni oqallittoqassaaq.

Nalunaarusiap saqqummiunneqannginnerani Naalakkersuisut tusagassiortunik ullumi katersortitsinissaminni saqqummiutissavaat, ullumikkumut sanilliullugu amerlanerusut akuuffigisaannik tusarniaanermi periutsit siunissami qanoq isikkoqarsinnaanerannut Naalakkersuisut isummersuutaat. Taassuma saniatigut aatsitassarsiornermi suliffissuaqarnikkut suliniutit annertuut pillugit inatsisip tunuliaqutaa aamma saqqummiunneqassalluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq