Tusarliineq: Afrikami arnani pisuunerpaaq Angolami milliardilikkaanik ujajaasimasoq

Afrikami præsidentiusimasup paniata pisuussuterujussuani qanoq pilersissimanerai, allagartat uppernarsaatit 700.000-init amerlanerusut, saqqummersinneqartut takutippaat.
Tusagassiortut ataatsimoortorpassuit Isabel dos Santosip – Afrikami arnani pisuunerpaatut nassuiaatigineqartartup – isertortumik isumaqatigiissusiortarluni milliardinikkaanik peqalersimaneranik saqqummersitsipput. Assi © : Nuno Coimbra [CC BY-SA (https://creativecommons.org/licenses/by-sa/4.0)]
Allattoq Ritzau
januaarip 20-at 2020 12:24
Nutserisoq Connie Fontain

Tusagassiortut ataatsimoortorpassuit Isabel dos Santosip – Afrikami arnani pisuunerpaatut nassuiaatigineqartartup – isertortumik isumaqatigiissusiortarluni milliardinikkaanik peqalersimaneranik saqqummersitsipput.

Isabel dos Santosip angutaa, José Eduardo dos Santos afrikap kujataani Angolami præsidentiusimavoq.

Nunat tamat akornanni tusagassiortut misissueqqissaartartut nunarsuarmi nutaarsiassaqartitsiviit annerpaat qassiiusut suleqatigalugit "Luanda Leaks"-imik taasaminnik saqqummersitsipput.

Isabel dos Santosip, præsidentip paniatut atuunnermini iluanaarutissaminik Angolami naalagaaffiup ingerlatseqatigiiffiinut isumaqatigiissusiortarsimasoq saqqummersinneqartuni atuarneqarsinnaavoq.

Imminut iluaqutaasunik isumaqatigiissuteqartoq

Taassuma portugalimiut uuliasiorfiani Galpimi piginneqatigiissutini 2006-imi pisiarisimagaa ilaatigut allassimavoq. Piginneqatigiissut Angolami uuliasioqatigiiffissuarmit, naalagaaffimmit pigineqartumit Sonangolimit pisiaraa.

Dos Santosip piginneqatigiissutip akiata 15 procentiinnaa akilerpaa, sinneralu Sonangolimit erniakitsumik atorluni akilerlugu, taakku 63 millionit euromik naleqarput.

Dos Santosip piginneqatigiissutaa ullumikkut 750 millionit euronik naleqarpoq.

46-nik ukiulik, Isabel dos Santos diamandinik suliffeqarfissuarmut, naalagaaffimmut pigineqartumut imminut iluanaarutaasumik aamma isumaqatigiissuteqarsimasoq, BBC allappoq.

Taassuma aningaasat piginneqatigiiffinnut aningaasaqanngitsunut qasserpassuusunut ilaatigut utoqqortersimavai.

- Aningaasaqarnermut suliffeqarfiit, eqqartuussissuserisut, naatsorsuuserisut, naalakkersuisunilu sulisorpassuit aningaasanik akileraaruseriffimmit toqqorterinermut ikiuipput, ICIJ allappoq.

Præsidentiusimasup Sonangolimi siulersuisut tamarmik soraarsereermagit pania, Isabel dos Santos pisortatut 2016-imi qinerneqarpoq.

Santosip aningaasaatai tigoqqusaajunnaartut

Isabelip atuuffik taanna angummi 2017-imi præsidentiujunnaarnerani annaavaa.

Isobel dos Santosip aningaasat 1 milliard dollarsit tikillugit tassa danskit koruuninngorlugu 6,7 milliardit koruuninik naleqartut aqullugit, Sonangolimit Sodiamimut imminut uiminullu Sindika Dokolomut akiliisimanera pissutigalugu Angolami oqartussat Isabel dos Santos siusinnerusukkut unnerluutiginikuuaat.

Isabel dos Santosip aningaasaatai Angolami decembarip naajartornerani tigoqqusaajunnaarput. Namminerli kukkusumik iliorsimannginnerarpoq.

- Pisuussutikka inuttut pissusera, silassorissusera, ilinniagara, suliniaqarnera anguniagaqarneralu atorlugit pilersitaapput, Isabel dos Santos Twitterikkut allappoq.

Inuussutissarsiornermut nutaarsiassaqartitsivik, Bloomberg naapertorlugu Isabel dos Santos 14 milliardit koruuninik nalilinnik pigisaqarpoq.

AAMMA ATUARUK Panamami pappilissanit atit saqqummiunneqartut

ICIJ "Luanda Leaks"-imik saqqummersitsisuusoq "Panama Papers"-imik taasamik tassa akileraarutinik peqquserlunnernik 2016-imi aamma saqqummersitsisuuvoq.