USA-p, nunatta Danmarkillu akornanni Washington D.C-mi sisamanngornermi isumaqatiginninniartoqaqqippoq.

Tusarfiit kinaassutsiminnik isertuussisut DR-imut paasissutissiipput.

USA-p sinniisorisaani Mike Needham sillimaniarnermut siunnersortimut tullersorti siuttuuvoq. Danskit kalaallillu sinniisuanni Jeppe Tranholm-Mikkelsen siuttuuvoq, nunanullu allanut naalakkersuisoqarfiup pisortaata, Mininnguaq Kleistip nunarput sinniisuuffigalugu.

DR-ip allaaserisaa naapertorlugu ilungersunartut suli taakkuupput: Illersornissaq pillugu siunissami suleqatigiinnissaq, sakkutooqarfinnik nutaanik pilersitsinissaq, aatsitassanut periarfissaqarnissaq kiisalu sakkutooqarfiit nunap immikkoortuani oqartussaaffeqarnissap oqallisigineqarnera.

Kinap ernumassutigineqarnera

Amerikamiut præsidentiata, Donald Trumpip USA-p Kalaallit Nunaat nunaminni sillimaniarneq pissutigalugu aqulertariaqaraa siusinnerusukkut oqaatigaa.

Taassuma Kalaallit Nunaannut Ruslandimit siooranartoqarnerarnikuuaa. Tamannali immikkut ilisimasallit arlallit eqqunnginnerarpaat.

USA nunarpullu sakkutooqarfiulersinnaasussanik misissuisut KNR-imit qaammammi matumani siusinnerusukkut saqqummiunneqarpoq.

Tusarfiilli Rusland ataatsimiinnermi ataasinnguamilluunniit eqqaaneqanngitsoq, DR-imut oqaatigaat.

Amerikamiulli Kinap siunissami aatsitassanut periarfissaqalernissaa ernumassutigigaat oqaatigineqarluni.

USA-p russit Kinamiullu inuussutissanut soqutiginninnerat pinaveersaartinniarlugu Kalaallit Nunaanni siunissami aningaasaliinissanut itigartitsisinnaalernissani kissaatigigaa New York Timesip qaammammi matumani siusinnerusukkut allaaseraa.

Landryp tikeraarnerata kingunera

Præsident Trumpip Kalaallit Nunaannut immikkut aallartitaata, Jeff Landryp sapaatip akunnerata siuliani tikeraarnera oqallinnermut pitsaasumik kinguneqanngitsoq, DR-ip tusarfiisa oqaatigaat.

Tamannali qanorpiaq isumaqarnersoq nassuiaatigineqanngilaq.

DR-ili naapertorlugu nunap kitaanut sanilerisap isumaqatiginninniaqatiginera ukiap aallartilaarnerani naammassineqarnissaa naatsorsuutigineqarpoq.