Tusagassiutit pillugit sisamariarluni naammagittaalliortoqarsimavoq
Tusagassiuinermut Tunngasuni Aalajangiisartut ukiumoortumik nalunaarutaat 2006-imoortoq saqqummiunneqaqqammerpoq, aalajangiisartullu siorna taamaallaat sisamanik suliakkinneqarsimapput.
Naammagittaalliuutit sisamat Tusagassiuinermut Tunngasuni Aalajangiisartut siorna tigusimavaat.
Naammagittaalliuutini sisamaasuni taamaallaat ataaseq tunngavissaqartutut nalilerneqarpoq, tassalu A/S Inissiaatileqatigiiffiup INI-p Atuagagdliutit pillugit naammagittaalliuutigisimasaanut tunngasoq.
A/S Inissiaatileqatigiiffik INI Atuagagdliutinit inissaaleqisunik atornerluisutut taaneqarsimavoq, suliamilu tassani Tusagassiuinermut Tunngasuni Aalajangiisartut aalajangerput, naammagittaalliuut tunngavissaqartoq.
Tusagassiuinermut Tunngasuni Aalajangiisartut isumaqarput, taaguut inissaaleqisunik atornerluisoq inunnut inissaaleqisunik aningaasannanniutiginnittunut nalinginnaasumik atorneqartartoq. Taaguummi inissaaleqinermik soqutigittaatsumik atornerluineq pineqarluni.
Atuagagdliutini allaaserineqartumi qulequtsiunneqarsimavoq ”Attartortoq ombudsmandimit taperserneqartoq: INI atornerluivoq.” Taamalu allaaserinninneq isornartoqartoq aalajangiisartut nalilerpaat. Aalajangersaasartut isumaqarput, atuartoq imatut paasinnissasoq, soorlulusooq Ombudsmandi INI-mik atornerluisuuneraasoq. Atuagagdliutinit kingornatigut nassuiaatigineqarsimagaluarpoq, attartortoq taama oqarsimasoq, aalajangiisartulli isumaqarput, attartortumit oqaatigineqarnera qulequttami erseqqissumik takuneqarsinnaanngitsoq, taamaattumillu tusagassiuinermi maleruagassanik unioqqutitsisoqarsimasoq.
Naammagittaalliuutit marluk Sermitsiamut tunngasuupput, tusagassiortutut ileqqorissaarnissamut tunngallutik. Meeqqanik kinguaassiutitigut atornerluisimasut eqqartuunneqarnerannik tunngasunik Sermitsiaq allaaserisaqarsimavoq, allaaserisalli taakku eqqortumik suliarineqarsimasut nalilerneqarpoq.
Naammagittaalliuut ataaseq Kalaallit Nunaata Radioanut tunngasuuvoq, naammagittaalliuulli taanna Aalajangersaasartunit itigartinneqarpoq, KNR-imut toqqaannartumik tunniunneqartussatut nalilerneqarluni.
