Tusagassiuteqarneq inatsisilerituunit ingerlanneqartariaqarpoq

Tusagassiuisarnermi akisussaassuseq pillugu inatsisimmik nutaamik peqalernissamut siunnersuutertik Naalakkersuisut ippassaq saqqummiuppaat.

Inatsit maannakkut atuuttoq Danmarkimi inatsit malillugu sanaajuvoq. Naalakkersuisullu isumaqarput nammineq peqartariaqalersugut.

Allannguutissatut suinnersuutigineqartut ilaat tassaavoq, tusagassiuteqarnermut ataatsimiititaliap siulittaasuata inatsisilerituujusariaqannginnera.

Tusagassiortut Peqatigiiffiata tamanna qisuariaateqarfigaa.

- Politikikkut isummertaatsip, misigissutsillu, aalajangiisarnerni tunngaviuallaalernissaat ernummatigaarput, tusagassiutillu killilersorneqanngitsumik sulisinnaanerat taamaalilluni sanngiillisinneqarsinnaalluni, Tusagassiortut Peqatigiiffiani siulittaasoq, Mariia Simonsen, oqarpoq.

Tusagassiortut Peqatigiiffiat isumaqarpoq, siulittaasoq siulittaasullu tullia tassaasariaqartut inatsisilerituut.

- Taamaalillunimi naalakkersuinikkut oqartussaasunut qanippallaannginnissaq qulakkeerneqassaaq, soorlu aamma aalajangiisarnerni misigissutsit tunngaviuallaannginnissaat qulakkeerneqarsinnaasoq, Tusagassiortut Peqatigiiffiat allappoq.