Trump: Tusagassiortumik toqutsineq Saudi-Arabiamik suleqateqarmut sunniuteqassanngilaq
Saudi-Arabiap kunngissaata Mohammed bin Salmanip tusagassiortup Saudi-Arabiameersup Jamal Khashoggip toqutaaneranut attuumassuteqarsinnaanissaa mattunneqarsinnaanngilaq.
Saudi-Arabiap kunngissaata Mohammed bin Salman aamma amerikamiut illersornissamut minsteriat James N. Mattis.
Allattoq Ritzau
novembarip 21-at 2018 06:27
Nutserisoq Mads Lynge
USA-lli Saudi-Arabiamik suleqateqarluarneranut siunissami sunniuteqarnavianngilaq.
USA-p præsidentiata Donald Trumpip tamanna oqaatigaa, oqaaseqaataalu præsidentip illorsuata Det Hvide Husip nittartagaanut ippassaq marlunngornermi unnukkut atuarneqarsinnaalluni.
Tusagassiortoq pineqartoq Saudi-Arabiap akerlerisaatut Saudi-Arabiami naalagaaffimmit nalilerneqartoq, Trumpip taassuma saniatigut innersuussutigaa.
Saudi-Arabiap kunngissaata Khashoggip toqunneqarnissaanut naalakkiisimanera ilimagineqartoq, USA-p isertortumik paasiniaasartuisa CIA-p nalunaarusiaani takuneqarsinnaavoq. Paasissutissalli taakku pisortatigoortumik suli uppernarsarneqanngillat.
