Tusagassiortorpassuit atornerlugaasunik akornusersuisut
Nunarsuaq tamakkerlugu aggersunit tusagassiortorpassuarnit illoqarfeerannguaq ilaqutariit najugaat Amstetten ornigarneqarsimavoq.
Ilaatigut oqaluttuarineqarpoq belgiamiut TV-ikkut nutaarsiassalerisut napparsimavimmut ilaqutariit paaqqutarineqarfiannut iseriaraluartarsimasut, aammalu assiliisut orpimmut napparsimaviup silataaniittumut qallorlutik pisarsimasut, napparsimaviullu tunuatigut isertorlutik iseriaraluartarsimasut.
Tusagassiortorpassuilli iseqqusaanngilluinnarnissaat paaqqutarineqaqqissaartoq erseqqissaatigineqarpoq.
- Ilaqutariit illersornissaat pingaarnerpaajutipparput, ilaqutariit taamak sakkortutigisumik misigisaqareersut qalleqqillugu tusagassiutitigut malersorneqarnissaat sakkortunerpaamik pinaveersimatissavarput, taama ilaqutariit najugaata napparsimaviup pisortaa Klaus Schwertner taama issuarneqarpoq.