Tusagassiortoq Askær pillugu naliliivoq

Royal Greenlandip pisortaanera Keld Askær soraartussanngortoq Sermitsiami allaaserineqarpoq. Keld Askær kiisalu siulersuisut siulittaasuat Paaviaaraq Heilmann tamanna pillugu oqaaseqarusunngillat. Keld Askærip soraarnissaa ilumoorsimassappat, tamanna pitsaasuunngitsoq aviisimi Børsenimi tusagassiortup Royal Greenlandilu pillugu malinnaasimasup oqaatigaa.

- Avataaniit isigalugu annilaanngatigineqarsinnaavoq suliffeqarfik aqutsisuminit aqunneqarani politikkikkunaasiit aqunniarneqarsimassappat, taamaattoqarsimappammi ajussaqaaq, tusagassiortoq Royal Greenlandip oqaluttuassartaanik malinnaaqqissaarsimasoq Niels H. Carstensen taama oqarpoq.

Taanna aperaarput, malinnaaqqissaarsimasut oqassaguni Keld Askæri ukiuni arlalinni pisortaareerluni ilumut soraartussanngorsimassappat, suna peqqutaasorineraa.’

- Taamatut oqaaseqassaguma eqqoriaasariaqalissaanga. Eqqoriaassagumali ilimagaara Keld Askærip suliffeqarfinnik allanik suleqateqalerneq nuannarisimassanngikkaa. Taassumami suliffeqarfik nutaamik qaffasissuseqartumik kivinniarsimagaluarpaa. Taamatummi kivitsisoqartuugaluarpat nunarsuarmut ammaassisoqarlunilu iluanaaruteqartoqarnerussagaluarpoq. Taannali aqqut aqqutigineqassappat Kalaallit Nunaanniit isigalugu una ajoqutaasinnaavoq Kalaallit Nunaanni suliffeqarfiit kalluarneqartussanngussammata.

Tusagassiortup Niels H. Carstensenip Keld Askær nersualaarpaa, oqarluni taanna Royal Greenlandimut pitsaalluinnartumik sunniuteqarsimaqisoq, Royal Greenlandilu aningaasanik taarsigassarpassuaqartoq ajorluinnartumillu ingerlaleruttortoq Keld Askær pisortanngormat suut tamarmik mumisinneqarsimasut. Soorluttaaq aamma KNI pitsammut mumisissimagaa.

Niels H. Carstensen nangilluni oqarpoq Kalaallit Nunaata Keld Askær assorsuaq qutsavissaqarfigeqigaa, taamalu politikkimi pissaaneqarniunneq tunngavigalugu taamaatittussanngorsimassappat assorsuaq uggornartuutissagini.

Royal Greenlandili aqagu tusagassiutinut nalunaaruteqariarpat sunarpiaq peqqutaasimanersoq paasinarsiumaartoq unnerpaa.