Danskit illersornissaqarfiat sakkutooqarnikkut atortussanik sakkutuunillu siullernik Kalaallit Nunaannut aallartitsivoq.

Tamanna DR-ip paasivaa.

Tusagassiivik naapertorlugu sakkutuut immikkut sulisitat siulliit illersornissamut tunngasunit allanit sakkutuunik tikilluaqqusinissamut piareersassapput.

DR aamma sakkutuut timmisartuannik Challengerimik illersornissaqarfimmeersumik Nuummut ataasinngornermi mittumik assiuteqarpoq.

Timmisartorli sakkutuunut immikkut sulisitanut atassuteqarnersoq DR-ip uppernarsarsinnaanngilaa, aamma Illersornissaqarfiup qullersaqarfia tamanna pillugu oqaaseqarumanngilaq.

Danmarkip Kalaallit Nunaannik illersuinera USA-p arlaleriarluni isornartorsiortarpaa.

Danmarkimi illersornissamut ministerip Troels Lund Poulsenip (V) Kalaallit Nunaanni sakkutooqarnerulernissaq marlunngornermi eqqartorpaa.

- Danskit illersornissaqarfiata Kalaallit Nunaanni ataavartumik amerlanerusunik sakkutooqarnissaa pillugu apeqqut maanna ingerlateqqipparput, aammali nunat allat peqataatillugit, Nunanut allanut tunngatillugu Aalajangiisartut ataatsimeereernerisa kingorna taanna oqarpoq.

Nato takussaanerussasoq

Tamatuma kingorna nunat Natomut ilaasortaasut allat peqatigalugit Kalaallit Nunaanni 2026-mi sungiusaqatigiittoqarnissaa illersornissamut ministerip eqqaavaa.

Troels Lund PoulsenBruxellesimut  ataasinngornermi angalassaaq, tassanilu Issittumi pissutsit pillugit Nato-p generalsekretæria Mark Rutte oqaloqatigissavaa.

USA-p Danmarkillu Kalaallit Nunaat pillugu aaqqiagiinngissutaat nunanut allanut ministeri Lars Løkke Rasmussen (M) Præsidentip Illorsuanut  pingasunngornermi kingusinnerusukkut tikeraarpat sakkortunerulersinnaavoq.

Nunanut allanut tunngasunut naalakkersuisoq Vivian Motzfeldt peqatigalugu USA-mi præsidentip tullersortaa J.D. Vance aamma nunanut allanut ministeri Marco Rubio Løkkep ataatsimeeqatigissavai.

Kalaallit Nunaat sammineqassaaq, ataatsimiinnerlu danskit kalaallillu kissaatiginninnerisa kingorna aaqqissuussaavoq.

Nunap isumannaatsuunissaa eqqarsaatigalugu USA-p Kalaallit Nunaat pissaaneqarfigilerusukkaa, USA-mi præsidentip Donald Trumpip siornali arlaleriarluni oqaatigisarpaa.

Danmarkip Kalaallit Nunaatalu tamanna itigartittuaannarpaat.

Issittumi Sakkutooqarfik, Kalaallit Nunaanni eqqaanilu Illersornissaqarfiup suliassaannik isumaginnittoq Nuummilu qullersaqarfeqartoq, 150-it missaannik ullumikkut  sulisoqarpoq, taakkualu immikkoortortaqarfinni assigiinngitsuni sulisuupput.

Issittumi Sakkutooqarfik aamma umiarsuarnik alapernaarsuiartortitanik, timmisartunik, qulimiguulinnik qimusserlunilu alapernaarsuisartunik Siriusinik atortussaqarpoq.

/ritzau/