Tusaamasarsuit tikeraarnissaat kinguarpoq
Franskit peqatigiiffiat Variétés Club de France nunatsinnut tikeraarusuppoq. Peqatigiiffillu taanna imaannaanngilaq ilaatigut ilaasortarigamigit arsaannermi tusaamasarsuit Michel Platini, Laurent Blanc aamma Zinedine Zidane. Taakku peqatigiiffiat arsaattartut kattuffiannut GBUmut saaffiginnissimavoq nunatsinnut tikeraarusullutik tassungalu atatillugu takutitsillutik arsaakkusullutik. Tikeraarnissaralualli juulip aallartilaarneranni pisussaagaluaq kinguartinneqarallarpoq.
Franskit arsaattartuunermikkut millionærinngorsimasut nammineq timmisartuminnik nunatsinnukarniarput najugaqarnertillu nammineq aamma akilerniarlugu. Pilersaarsimagaluarput inuit 40-t 50-t missaanniillutik nunatsinnukarniarlutik timmisartorli atorniagaat Nuup mittarfiannut minnissaminut angivallaarpoq.
- Taamaattumik angalanissartik kinguartikkallarpaat. Kisianni tassa piffissaq alla tikeraarusuttorujussuupput, Jens Tang Olesen pilersaarusiornermi GBUmut siunnersortaasoq oqarpoq.
Club Varietep tikeraartitassaasa aqqi GBUmit suli pissarsiarineqarsimanngillat. Peqatigiiffik taanna ukiumut arlaleriarluni takutitsilluni arsaattarpoq pisumiilli pisumut kikkut arsartuunersut allanngorartarpoq tusaamasarsuit taakku qanoq piffissaqarnerat apeqqutaasarmat.
