Nunatsinnut takornariat internettimik atuivallaarneq-ajortut

Visit Greenlandip naatsorsuutigisaatut takornariat Nunatsinniikkaangamik qarasaasiatigut inuit attaveqarfigisartagaasigut allappallaartanngillat.

Takoqqusaarut hashtag#GreenlandPionerimi tapersersortissarsiornermi takornariartitsisarfiup misissuinerani taamaallaat syv procentit taanna ilisimasimavaat, naak nunat tamalaat akornanni taanna takornariatitsisartunit nersorneqaraluartoq.

Kalaallit Nunaannut takornariat akornanni tikeq assiliissutinut atorluarneqartaraluaqaaq.

Asserpassuusaraluartut taamaallaat takornariat sisamaangaangasa ataaseq maani assilisaminik qarasaasianut inuit attaveqarfigisartagaannut assilisaminik ikkussisarpoq.

Takornarianit Visit Greenlandip oqaloqatigisimasaanit 400-juusunit taamaallaat syv procentit hashtag#GreenlandPioneri ilisimasimavaat. Taannaagaluarpoq suliniaqatigiiffiup takoqqusaarutaani pingaaruteqartupilussuaq.

Pisortaagallartoq Lykke Geisler Yakaboylu naapertorlugu maanga takornariartartut pissusaat peqqutaavoq.

- imaassinnaavoq utoqqasaajunerusut maanngartartut, qarasaasiatigut inuit attaveqarfigisartagaasigut hashtaginik atuivallaartanngitsut.

Naallu takornariat instagramimik atuinerat takornariartitsiviullu hasgtagianik takusarpiartarsimanngikkaluartut,  Lykke Geisler Yakaboylu isumaqarpoq suliaq asuliinnarsimanngitsoq.

- Naamik taamaassorinngilluinnarpara.

Isumaavoq takornariat misigisatik pillugit ikinngutitik ilaquttatillu oqaluttuuttassagaat, taamaaliornermi sunniussinnaaneq annertunerummat. Visit Greenlandimit pinnani.

AAMMA ATUARUK Nunarput Instagrammimi iluatsitsilluartoq

Kalaallit Nunaanni misigisatik takornariarpassuit pitsaanerpaatut nalilertarpaat, apeqqutaanngilarlu qanoq ilillutik oqaluttuarnersut, pisortaagallartoq oqarpoq.

- Qularinngilluinnarpara angerlaraangamik oqaluttuarisaraat, nuannersumik oqaluttuartartillugit isumaqanngilanga asuli suliaasoq. Qanoq ilillutik oqaluttuarineraat apeqqutaanngilaq, arlaat hashtagiluunniit atorneraat apeqqutaanngilaq, Yakaboylu naggasiivoq.

Visit Greenlandip takoqqusaarusiaa digitaliusoq, takoqqusaarullu #Greenland Pioner nunat tamalaat akornanni takornariartitsivinnit arlaleriarluni nersualaarneqartarsimapput.

AAMMA ATUARUK Kalaallit takornariartitsineq pillugu filmiliaat nersorniarneqartoq