Qulaarpaa Takornariaqarneq illersorneqartariaqartoq
![](/sites/default/files/styles/image_934x467/public/user_pictures/DahlMarie_Maniitsoq__arferit_039.jpg?itok=V0H6F4EJ)
Takornariaqartitsisut ilaat taama oqarpoq:
- Touring Greenland arfanniartarneq pillugu ima isumaqarpoq: Puulukitorsinnaaguit taava arferup neqaanik aamma nerisinnaavutit. Uanga arferup neqaanik nammineq nerisaqartarpunga, avatitsinnili ilaatigut arfanniartoqartarnera eqqarsarnartoqartippara, takornariat umiarsuarmik angalaartut isigisinnaasaannik arfanniartoqartarnera eqqarsarnartoqartikkakku, Jon Krogh, Nuummi takornariaqartitsisut ilaat oqarpoq.
Arferup neqaanik nerisaqartarpoq, assersuutigaluguli takornariat arfernik takuniaasinnaanissaat aamma suliaralugu:
- Arferit sulinitsinni pingaaruteqarluinnarput, soorunami. Tikeraartugummi tikikkaangamik arfernik takunissartik naatsorsuutigisarpaat, Jon Krogh oqarpoq.
Aamma atuaruk Angalatitsisartoq najukkami suliniutinik ujartuisoq
Takornariallu Nunatsinnukartartut amerlanerulissappata nunap immikkoortui ilaat inatsisitigut illersorneqartariaqartut taanna isumaqarpoq:
- Kikkut nunap immikkoortuinik assigiinngitsunik akisussaaffeqassanersut pillugu oqallittoqassagunarpoq. Aningaasaleerusussinnaasut amerlissappata nunap immikkoortuisa ilaat takornariaqartitsinermut taamaallaat atorneqarsinnaasariaqarput, Jon Krogh oqarpoq.
Kalaallit Nunaata takornarianut nittarsaanneqarnissaa Visit Greenlandip akisussaaffigaa, Jon Kroghillu oqarneratut arferit matumani pingaaruteqartut isumaqataaffigaat:
- Takornarialerisuulluni taakku arferit takussaaneri soorunami aamma periarfissiipput produktinik ilanngussinissamut, misigisaqartitsinissamut ilanngussinissamut. Assersuutigalugu umiarsuit sinersortaatit tikinneranni, Mads Daniel Skifte, Visit Greenlandimi siunnersorti, taama oqarpoq.
Aamma atuaruk Takornariaqarnerup inerisarnissaa suliassarujussuuvoq
Arferit Nuup avataaniittut mianerineqarnerusalissappata tamanna aalisartunut piniartunullu aningaasartuutaanerulissasoq KNAPK isumaqarpoq, siunnersuut taamaammat isumaqatiginngilaat:
- Ungasinnerusumut arfanniassagaanni soorunami orsussamik inuttanik assartuinikkullu atuinissaq eqqarsaatigisariaqarpoq, ujaasinissarlu arfernik. Taamaammat orniginanngivippoq, Bjarne Lyberth, KNAPK-mi biologi taama oqarpoq.
KNR TV-mi oqalliffik Qulaarpaa, sisamanngorpat aallakaatinneqarpat, politikerit takornarianillu sullissisartut, takornariat amerlanerusut tikisinneqarnissaannut Kalaallit Nunaat piareersimanersoq oqallisigissavaat.
Aamma atuaruk Naalakkersuisut takornarianik amerlanerusunik takunissartik qilanaaraat