Tupaarnanik naatitsillutik tunisassiulersut

2010-mili qallunaat kalaallillu nerisassanik nioqqutissiorfiat Qaqortup eqqaani misileraavik Upernaviarsuk suleqatigalugu misileraalluni tupaarnanik naatitsisalersimavoq.

Kvann Kompagniet issittumeersunik tunisassiorneq immikkut sammisarilersimavaa, soorlu naatitanik panertitsisarluni. Malunnarsipallassimavorli tupaarnanik naammattunik pinngortitami pissarsinissaq ajornakusoortuusoq, nunap qaava atuarlugu siammasittorujussuarmik naasarmat.

Misileraavimmiilli nalunaarusiap nutaarluinnaap takutippaa, iluatsittumik naatinneqarsinnaasoq. Nakkutigineqartariaqarpianngilaq - imertertariaqarani saliinaranilu. Kvann Kompagnimi paasivaat tupaarnanik naatitsineq salatitut majroatullu naatitsinertulli pissarsinartigisoq. Tupaarnanilli naatitsineq sulinannginnerujussuuvoq, allaallu imaassinnaasoq ukiumut marloriarluni katersisoqarsinnaalluni.

Suliffeqarfik maanna neriulerpoq, savaatillit Kujataanilu naatitsisartut paasisaq atorluarumaaraat taamaattunillu naatitsisalerlutik.

- Periarfissaq tassaniippoq. Uppernarsivarput tupaarnat nunanut allanut tunisassiarineqarsinnaasut. Neriuutigiinnalerparput naatitsinissamik soqutiginnittoqassasoq uatsinnillu pilersuilerlutik, Kvann Kompagnimik aallartitseqataasoq Klaus Mildahl Clemmens oqarpoq.

Suleqataasoq Anne Sofie Hardenberg peqatigalugu tunisassiorfik kuannit atorlugit kissaallammik, immiaaqqanik taratsunillu iluatittumik tunisassiortarsimapput sulilu allanik tunisassiornissaminnik pilersaaruteqarlutik.

Aammattaaq nerisassiornermut najoqqutassaq "Mamaq" saqqummersissimavaat.