Tupa inuiaqatigiinnik mangiaavoq

Pujortartartarnermut atatillugu inuiaqatigiinni isiginnittaaseq allanngortinniartariaqartoq, Atassut sinnerlugu inatsisartuni ilaasortaq Kristian Jeremiasen isumaqarpoq. Tupamut atatillugu Kristian Jeremiassen-ip oqallissaarinermini oqarpoq, inunnit tamanit ornigarneqartartuni pujortartarnerup unitsinneqarnissaata inatsisitigut ujartuiffigineqarnissaa pisariaqartoq.

- Inatsisit unitsinnavianngilai pujortartarnerit tamaasa. Isumaqarpungangili nunatsinnut inatsit eqqunneqartuugaluarpat, inuiaqatigiillu oqallisigigunikku, pujortartarnerup minnerpaaffiminiitinneqarnissaa, aammalu init peqqinnartut, tassalu init pujortarfiunatik silaannarissut isersimaffigissallugillu peqqinnartut. Soorlu grillbaarini, neriniartarfinni unnuisarfinni pujortartoqannginnissaa pingaaruteqartutut, namminerlu inuttut soqutiginartuutippara, Atassut sinnerlugu inatsisartuni ilaasortaq Kristian Jeremiassen taama oqarpoq nangillunilu: Uagut politikkerit kisitta pinnata aammali innuttaasut oqalliseqataanissaat uanga pingaartippara. Tupa annertoorujussuarmik inuiaqatigiinnut mangiaavoq, asasamik kammalaatimik ilaquttamik annaasaqarneq aamma ilaatigut pissutaaqataavoq, pujortarpallaarnermik. Taamaattumik tupa pillugu isiginnittaaserput oqallisigeqqittariaqarparput, Kristian Jeremiassen naggasiilluni taama oqarpoq.

Tupatortarneq pissutaalluni puakkut kræfteqarlutik toqusimasut 2003-mi 34-iusimapput.