Tunup imartaani qilalukkanik qaqortanik naammattuuisarnerit akulikilliartortut
![](/sites/default/files/styles/image_934x467/public/article_images/hvidhvaler_foto_sk8mama_flickr_crativecommons_0.jpg?itok=vfTJunj6)
Tunup imartaani immikkoortunik qilalukkanik qaqortaqatigiinnik peqanngitsoq, siornatigut isumaagaluarpoq. Tunullu imartaani qilalukkanik qaqortanik naammattuuisoqarsimappat Pinngortitaleriffiup ilisimatinneqartarnissani soqutigisorujussuuaa.
- Assersuutigalugu qassutini qilalukkamik qaqortamik pisaqartoorsimagaanni tassanngaanneersumit misissugassanik, soorlu isaanik, kigutaanik mattamernganeersunilluunniit Pinngortitaleriffimmiit pissarserusuttorujussuussaagut. Qilalukkap qaqortap pisarineqartup suminngaanneernera misissukkanik taama ittunik iluaquteqarluni paasiniarneqarsinnaassaaq, Pinngortitaleriffimmit allattoqarpoq.
Tunup imartaani qilalukkat qaqortat takuneqartut suminngaanneersimanissaat naluneqaraluartoq, Svalbardiminngaarneersuunissaat ilimagineqarpoq.
Tunup imartaani qilalukkat qaqortarniartoqartalissagaluarpat, taava qilalukkat qaqortat takuneqartartut qilalugaqatigiinnut sorlernut atasuunerat, qanoq akulikitsigisumik qaqortanik takusoqartarnera aammalu qanoq amerlatigisut takuneqartarnerat Pinngortitaleriffiup ilisimasariaqaraa, Pinngortitaleriffik tusagassiuutinut nalunaarummi allappoq.