Tunup imartaani avaleraasartoortassat affaat kalaallit aalisariutaannit aalisarneqassapput
- Avaleraasartoorniarnissamik qinnuteqartunit pisassinneqartussatut salliutinneqartut aalisarsinnaasaat tunngavigalugu, inassutigaarput TAC-p 100.000 tonsiusup 52 procentia, 52.000 tonsit, nunatsinni nammineq pigisaminnik aalisariutilinnut pisassiissutigineqassasut, Naalakkersuisoqarfik inassuteqarluni taama allappoq.
Aalisarnermut, Piniarnermut Nunalerinermullu Naalakkersuisoqarfiup avaleraasartoorniarniarluni qinnuteqaatit katillugit 37-t tigusimavai, taakkunanngalu aqqaneq-marluk akuerineqarsimapput.
Qinnuteqartut avaleraasartuut katillugit 300.000 tonsit aalisassallugit qinnutigisimavaat, tassalu pisassiissutigineqartut pingasoriaataat, taamaammat qinnuteqartut tamaasa pisassinneqarsinnaasimanngillat.
Aalisarnermut, Piniarnermut Nunalerinermullu Naalakkersuisup Finn Karlsenip nunatsinni sapinngisamik annerpaamik suliffissaqartitsinissaq siunertaralugu avaleraasartoortassanik agguaassinermi kalaallit aalisariutaasa salliutinneqarnissaat qaammatit marluk matuma siorna erseqqissaatigaa.
Aalisarnermut Naalakkersuisoqarfiup kalaallit aalisariutaannut pisassiissutigineqartut 52 procentit saniatigut, 38 procentit ilaatigut umiarsuaatilinnut angallatinik attartukkanik atuisunut agguaanneqarnissaat inassutigaa
Kiisalu TAC-imit sinneruttut 10 procentit, tassalu 10.000 tonsit, immikkoortinneqassapput, avaleraasartoorniarnerup nalaani ingerlatseqatigiiffiit aalisarluartut taakkunannga immikkut pisassinneqarsinnaassallutik, Aalisarnermut, Piniarnermut Nunalerinermullu Naalakkersuisoqarfik taama ilisimatitsivoq.
