Tunup avataani nuna sajorujussuarpoq
Tunup Jan Mayenillu akornanni immap naqqani sajuppillarujussuarneq amerikamiut nunap sajunneranik nalunaarsuiffianit USGS-mit nalunaarutigineqarpoq. Immap naqqani sajunnera nunap sajunneranut uuttuisarnermi 6,6-mut uuttorneqarsimavoq.
Kalaallit Nunaanni Danmarkimilu ujarassiornermut misissuisoqarfiup GEUS-ip KNR-mut uppernarsarpaa immap naqqani sajuttoqarsimasoq. GEUS-imiit ilimagineqanngilaq tassaarnertut ittunik malissuarnik tunumut qaartoqarnissaa.
- Kangilinnguani sakkutooqarfimmiit tunumi sakkutuut suliaqarfii attavigineqarput taakkuli arlaannik malussarsimanngillat, Kangilinnguani sakkutooqarfik nalunaarpoq.
USGS nittartakkamini allappoq immap naqqani sajuppillannerup qeqqa Jan Mayenimi illoqarfimmit Olokinbyen-imit 93 kilometerisut ungasitsigisumiittoq.
Immap naqqani aamma sajuppillaqqittoqarpoq tamatumuuna richterip uuttuutaani 5,2-mut uuttorneqartumik. Sajuppillannerup kingulliup qeqqa Olonkinbyen-imiit 24 kilometerisut ungasitsigaaq.