Tunup avannaarsuani filmiliamik takutitseqqaarneq
Umiarsuaaraq Activ Københavnimit Tunup avannaarsuanut ukiup aappaa avillugu matuma siorna aallarpoq. Ilisimasassarsiornerup siunertaraa qanga issittumut ilisimasassarsiornerit malinnissaat, tassalu eqqumiitsuliortut ilisimatuullu peqatigiissillugit takusaminnik nassuiaateqartinnissaat. Tamannalu maanna filminngortinneqarsimavoq, Göteborg Filmfestivalimilu sisamanngorpat takuteqqaarneqassaaq.
KNR-ip filmi takullatsiarsimavaa, immiussatigullu kusanarluinnartukkut ilaatigut nanoq piniartut illuaraannut isertertoq, biologi uumasumik nutaarluinnarmik nassaartoq inuunerullu isumaanik titartagaq takutinneqarput. Filmilli sumorpiaq tunngassuteqarnera imaaliallaannarlugu oqaasertaleruminaappoq. Ilitsersuisup nammineerluni inuunerup naggatissaanut tunngassuteqarnerarpaa, immaqaluunniit naamik:
-Nunarsuulli naggatissaata pilinnginnera piffissap ilaani nassuerutigisariaqarpoq. Inuit nunarsuarmi uumasuni maannakkorpiaq sallersaapput, siunissamilu ungasippallaanngitsumi nunarsuup naggatatissaa immaqa angujartorparput, inuunerli nukittuujuvoq mattusuujullunilu, imaaliallaannarlu peerutsitassaanani. Taamaammat filmi inuunermut uumassuseqarnermullu sumulluunniit nersorinnissutitut uanga isigaara, Daniel Dencik oqarpoq.
Tunup avannaarsuanut ilisimasassarsiorneq qalipaasup Per Kirkebyp ujarassiuullu Minik Rosingip suliniuteqarnerisigut pilersinneqarpoq. Eqqumiitsuliortut ilisimatuullu katillugit 29-t eqimattakkuutaani pingasuni ullut 14-ikkuutaarlugit umiarsuarmut ilaasarsimapput. Taakku ilagaat eqqumiitsuliortut Tal R aamma Daniel Richter, assilisaminik eqqumiitsuliortoq Per Bak Jensen, aanaveersaasoq Jeppe Møhl aamma marinebiolog Katrine Worsaae.
Silarsuup isuanut ilisimasassarsiorneq Nunatsinni Katuami februaarip 12-iani takuteqqaarneqassaaq aammalu Ilulissani Sermermiuni februaarip 17-ianit 19-ianut takutinneqassalluni. Tamanna sioqqullugu Future Greenlandip ataatsimeersuartitsinerani Katuami sapaatip akunnerata tulliani ingerlanneqartussami aamma takutinneqassaaq. Filmi takutissallugu nunarsuarmit tamarmit pilerigineqartupilussuuvoq, maannamullu Sverigemi, Danmarkimi, USA-mi, Mexicomi immaqalu aamma New Zealandimi takutinneqartussalluni.
