Tunup avannaarsua ilisimasassarsiorfigilerpaa

Angalaneq tyskisut taaguuteqarpoq Expedition Grönland Nordost - Tunup avannaarsuanut Ilisimasassarsiorneq.

- Sermip maannamut ilimagineqartumit sukkanerusumik aakkiartornera, silallu pissusaata allanngoriartornera unamminartuuvoq, tamatsinnullu tunngasuulluni, Flensborgimi umiarsualivimmit, Musumshafenimit, Danmarkimut killeqarfiup kujatinnguaniittunit, aallalivilluni Arved Fuchs oqarpoq.

Tysklandimi aviisimi allaaserineqarpoq, "allakkanik puiaasamiittunik" taaneqartartumik digitaliusumik nassitsinissani Arved Fuchsip pilersaarutigigaa.

Tamanna tassa ima paasisariaqarpoq, umiarsuup Dagmar Aaenip angalanermini tikiffissaminut avannarpasinnerpaamut piguni, Tunumilu sikorsuit akullaamippata, umiarsuarlu ingerlaqqissinnaalerluni, nassitsissummik puttaamut inissiisoqassaaq.

Puttaap kujammut illuariartornera qaammataasat aqqutigalugit nunarsuaq tamakkerlugu malinnaavigineqarsinnaassaaq, puttaaq nungulluni aappat nassitsissutip takuneqarsinnaajunnaarnissaata tungaanut. Paasissutissat tamarmik, qaammataasap katersugai, silap pissusaata allanngoriartornera pillugu Sydafrikami Durbanimi ukioq-manna kingusinnerusukkut ataatsimeersuartoqalerpat uppernarsaatitut atorneqassapput.

Inuusuttut qulit nunanit assigiinngitsunit arfineq-pingasuneersut umiarsuarmik Dagmar Aaenimik aamma angalaqataassapput. Tunumut apuutsinnatik umiarsuarmi inuttat silap pissusaata allanngoriartornera pillugu inuusuttut ataatsimeersuarneranni Islandimi Húsavikimi pisussami peqataassapput, ataatsimeersuarneq taaguuteqarluni "Ice Climate Education".