Tunup Avannaani najugallit kingulliit takussutissaqalerunarput

Siulitta ilaat, Thulekulturimik taaneqartartut, 1800-kkunni sooq Tunup Avannaaniikkunnaarsimanersut, qanganisarsiuut nassaavisigut paasineqalerunarpoq. Ilisimatuut qeqertamut Hvalros Ø-mut, taamaallaat 2 kvadratkilometerisut angitigisumut, aasaq pipput, tassanilu toqqit 500-t inikuinik peqqumaasivinnillu 1500-nik nassaarlutik. Qeqertap eqqaata sikuneq ajornera inuit piniartutut inuuniarnerannut pingaaruteqarluinnarsimavoq. Kisianni piniarneq arlaannik peqquteqartumik ajornarsimmat inuit qeqertaq qimattariaqarsimavaat. Qanganisarsiooq, Bjarne Grønnow, ilisimatuut ukiut kingulliit aasaanerani paasisassarsiorneranni pisortaasartoq, taama oqaluttuarpoq.

januaarip 26-at 2009 17:27

Soorunami takorloorneqarsinnaavoq inuit piniagassaarukkamik nuussimassasut. Avannaarsuanimi ukiup ingerlanerani piniagassaaleqisoqartarpoq, soorlu Tunup avannarpasinerusortaani aasarisseruttornerani piniagassaaleqisoqarsinnaasarpoq. Upernalerneranili piniagassaqarluarsimappat aasami piniagassaqarpiannginnissaanut peqqumaasersorluarluni eqqanaarsartoqarsinnaavoq. Takorloorutsiguli sarfarnera, silalluunniit pissusaata allanngornera, pissutigalugu imarnersaq matujartulersimasoq, tamarmiluuniit sikusalerluni, taava inuussutissaqarniarneq ajornarsisimassaaq. Eqqaamasariaqarparpummi assigiinngitsutigut allannguutimininnguit, avannaarsuani avatangiisinik annertuumik allanngortitsisinnaammata. Taamaassimappallu aavernik arfernillu mikinernik peqqumaasersorsinnaajunnaarsimassapput. Tamakkua pissutaasimasinnaalluarput. Allarluinnaalli aamma pissutaasimasinnaapput. Soorlu europamiut 16 -1700-kkunni taavani arfanniarpassuusimanerat, naggataatigut arferit annerit nunguusavillugit. Tamanna aamma inuit taavani najugallit inuussutissaarunnerannik kinguneqarsimasinnaavoq. Mannali tikillugu paasisavut naapertorlugit oqaatigisinnaanngilarput, Thulekulturimik taagukkatta nalaani, arferit annerit inuit qanoq pisariaqartissimatigineraat. Kisianni paasisavut naapertorlugit inuit inuussutissaarunnertik pissutigalugu nuuttariaqalersimassasut ilimagaarput. Immaqalu Tasiilap tungaanut nuussimasinnaallutik, Tunup avannaani paasisassarsiortut pisortaat, qanganisarsiooq Bjarne Grønnow oqarpoq.

Nunat tamat issittumut ukiorititaannut atatillugu, ataqatigiissaakkamik ilisimatuut paasisassarsiornerat, GeoArk, maajip tungaanut ingerlanneqassaaq.

Tunup avannaarsuani naggueqatigiit Inuit kingulliit pillugit nittartakkami www.polarfocus.dk-mi atuarsinnaavutit.

Tunup Avannaani najugallit kingulliit takussutissaqalerunarput

Aamma atuaruk