Tunumiut immikkoortitaasoripput

Kuummiuni atuarfiup pisortaa Mikkel Boassen oqarpoq ataasiarnani, nassiussanilluunniit pingaannginnertut Air Greenlandimit misigitinneqartarluni.

Mikkel Boassenip allallu 20-t missaanniittut Nuummit aallarnissartik pingasunngormalli utaqqivaat:

- Imaakkami, ilaatigut takusaratsigit ulluni Nuummi utaqqinitsinni, soorlu Kangerlussuarmut utimulluunniit nassiussanik assartuisoqartartoq. Malugisarparput immaqa taakkuninnga nalikinnerusutut inisseqqasugut. Uangaannaanngilaq, arlallit Tunuliartut taamatut malugisarpakka misigisut, Mikkel Boassen oqarpoq.

Kuummiuni atuarfiup pisortaa sulinermut atatillugu ukiumut arlaleriarluni kitaanut angalasariaqartarnermini Tunumiut tunulliunneqartarnerat malugisaannarpaa. Nalinginnaasumik pingasunngornermi arfininngornermilu Kitaanut Tunumut utimullu ingerlasoqartarpoq.

- Ilaatigut Kangerlussuarmi aamma taamatut misigitinneqartarpugut aammalu takusarluta.

Taamaammat Nuummit tunuliarniartut arlallit peqatigalugit allakkanik naammagittaalliuutinik Air Greenlandimut allagaqarput.

- Angorusupparput, soorlu nalinginnaasumik pingasunngormat sila ajormat angalanissaq taamaatimmat, ullup tullianut nuutissimanissaa.

Pingasunngornermi aallartussaagaluit arfininngornermi nalinginnaasumik angalanissamut ilaatillugit aallartussanngortinneqarsimapput. Arfininngormalli sila aamma ajormat, Tunumut aallarnissaat ullumimut kinguartinneqarpoq.

- Aallarnissaq ullup tullianut nuutillugu pisimassagaluarpoq. Uparuaavugut, ullorpassuit silap ajunnginnerani aallarnissamut periarfissaasaraluartut utaqqitinneqartaratta. Inissikkusukkaluarpugut angalasutut Kitaani.

Mikkel Boassen taama oqarnermigut eqqarsaatigaa kitaani angallannermi kinguaattoortoqartillugu aqaguani ingerlaqqittoqarsinnaasarnera.

Tunumut Tunumiillu angalaniarnermut tunngatillugu Air Greenlandimit oqaaseqartitsiniaraluaratta iluatsitsinngilagut.

Nuummit Tunumut ingerlasussat suli Nuumminngaanniit allanngillat, arfininngormat silarlunnera pillugu ingerlaqqissinnaannginnamik.