Tunumiut ilinniarfissaannik Akitsinnguaq Olsen ujartuivoq

Inatsisartunut ilaasortap Inuit Ataqatigiinneersup, Akitsinnguaq Olsenip, paaserusuppaa, Tunumi inuusuttut ilinniarnissaannut periarfissat Naalakkersuisut qanoq iliuuseqarfiginiarneraat.
Allattoq Karsten Sommer
aggustip 03-at 2009 07:12

Tasiilami inuusuttut aatsaat taama amerlatigisut ilinniaqqikkusullutik qinnuteqarsimasut tusagassiorfitsigut qanittukkut tusarliunneqarpoq. Tasiilamili inuusuttut amerlanersaasa itigartittariaqarnissaat ilimagineqarpoq, inuusuttunut inuutissarsiornermullu ilinniaqqikkusuttut sungiusarfissanik periarfissaasa killeqarnerujussuat pissutigalugu.

Taamaammat Akitsinnguaq Olsen paragraf 36 naapertorlugu Naalakkersuisunut apeqquteqarpoq, inuusuttut qassit Tunumi ukioq manna ilinniagaqalersinnaassanersut, ilinniarnermullu atatillugu suliffinnik sungiusarfissaaleqineq aaqqiiviginiarlugu suliffissaqarnikkut ilinniartitaanikkullu iliuusissanik Naalakkersuisut qanoq eqqarsaatersuuteqarnersut?

Akitsinnguaq Olsenip aamma paaserusuppaa inuusuttut isorliunerusuninngaaneersut suliffinnik sungiusarfissarsiortut nuttarsinnaanermut aningaasaateqarfimmit ikiorserneqarsinnaanersut, imaluunniit illoqarfinni anginerusuni ilinniartut ineqarfiinik sanaartornissaq Naalakkersuisut eqqarsaatigisimaneraat.

- Oqartuarpugut inuusuttortavut Nunatta pisuussutaanni pingaarnerpaanerarlugit. Tamannalu ilumoorukkutsigu inuusuttut pisariaqarteqisatsinnik ilinniagaqarusuttut periarffissittariaqarpavut, Akitsinnguaq Olsen paragraf 36 naapertorlugu apeqquteqaatini naggaserlugu allappoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq