Tunumi uuliakoortoqaqqigunartoq

Tasiilap avannamut kangiani Sermiligaap kangerluani uuliakoortoqarsimasinnaaneranik nalunaartoqarmat oqartussat qisuariapallapput.
Assi © : Nils Baum, Bureau for Inatsisartut
Allattoq Jonas Fievé
aggustip 29-at 2015 17:31

Innuttaasup uuliakoornerusinnaasumik takunninnerminik oqartussanut nalunaarutiginnippoq.

Nalunaartoqarnerata kingorna umiatsiaaqqat marluk Sermiligaap kangerluanut uuliamik ujaasiartortillugit aallartinneqarsimapput, uuliali takuneqarsimasoq suli nassaareqqinneqanngilaq.

- Tunumi suli allamik uuliakoortoqarsimasinnaanera nalunaarutigineqarmat isumakuluutigaara. Kikkut tamarmik uuliamik mingutsitsinermik takussutissaasinnaasunik takusaqarsimasinnaasut Pinngortitamut, Avatangiisinut Inatsisinillu Atuutsitsinermut Naalakkersuisoqarfik imaluunniit najukkami upalungaarsimasut attaveqarfigeqqullugit kaammattussavakka, pinngortitamut, avatangiisinut inatsisinillu atuutsitsinermut naalakkersuisoq, Mala Høy Kúko taama oqarpoq.

Aamma atuaruk Tunup avataani uuliaarluertoqarsimaneranik siumugaqartoqanngilaq

Pinngortitamut, Avatangiisinut Inatsisinillu Atuutsitsinermut Naalakkersuisoqarfiup Issittumi Sakkutooqarfiup innuttaasullu annertuumik tunniusimanerat ikiuukkumanerallu nuannaarutigaat.

- Sermiligaap eqqaani uuliakoortoqarsimasinnaanera pillugu suliami ikiuussimasut piffissamilu aggersumi sumiiffimmi angalaartut eqqummaarillutik alaatsinaassamaartut tamaasa qutsavigaakka. Tamatta immani avatangiisivut sunnertiasut paarilluassavagut, aammalu ilisimavara, mingutsitsinerup sumiiffia paaseqqissinnaagaanni, sumiiffimmi upalungaarsimasut aallarnissamut piareersimasut, Naalakkersuisoq Mala Høy Kúko tusagassiutinut nalunaarummi allappoq.