Tunumi silasiorfitoqqat misissuiffiginiarpaat
Silasiorfitoqqat Sorsunnersuarmit Kingullermeersut arlallit Clavering Ø-mi Eskimonæs-ip eqqaaniittut itsarnisarsiuunit assaavigineqarlutik aallartinneqareerput.
- Silasiorfiit Kalaallit Nunaanniittut soqutiginartuupput, taakkunanimi kikkut silasiortuusimanersut ilisimavavut. Aqqi tunuliaqutaallu ilisimavavut, taamaalilluta silasiorfilerngusaannerni inuit ataasiakkaat sulerisuunerat pingaarutaallu qulaajarsinnaallutigik, itsarnisarsiooq Jens Fog Jensen Danmarkimi Katersugaasivissuarmeersoq oqarpoq.
Sorsunnersuarmi kingullermi Tyskinit illuatungaanilu illersoqatigiinnit, timmisartukkut aqqartartutigullu sorsuunnerminni, silamik ilimasaarutit pinngitsoorsinnaanngilaat. Taamaattumik sorsuunnermi pitsaasunik silamik ilimasaarusiortoqartarnissaa pingaaruteqarluinnarmat, illuatungeriit Nunatsinni silasiorfiliorput, Tassami taamaaliornermikkut Europa tamakkerlugu silamik ilimasaarusiorsinnaassagamikku.
Silasiorfiit ilarpassui Sorsunnersuarmi kingullermeersut, sorsunnersuup oqaluttuarisaaneranik immikkut ittumik oqaluttuartuupput, taamaattumik tamakkua Katersugaasivissuup misissuiffigeqqissaaleruttorpai.
- Kalaallit Nunaanni silasiorfinni pisimasut ilisimatusarnikkut uppernarsaasersorneqarsimanngillat. Taamaattumik paasisat ataatsimoortillugit saqqummiunnissaat pilersaarutaavoq, Jens Fog Jensen Kristeligt Dagbladimut ilaatigut taama nassuiaavoq.