- Kalaallit Nunaat atorfissaqartipparput. Asuliinnaanngilaq. Issittoq Ukraineminngarnit aatsaat aallarteqqammertumik ajornartorsiutaaneroqaaq. Issittumi sakkutooqarfitsinnik amerlisaasariaqarpugut.

Politikeri Ruslandimiu Vladimir Putinip partiianeersuusoq, tassa Forenet Ruslandimeersuusoq Andrej Guruljov Ruslandip naalagaaffiata tv-qarfiani ataasinngormat oqallinnermi taama oqarpoq.

USA Ruslandilu Kalaallit Nunaannik avitseqatigiinnissamik isumaqatigiissuteqarnissaat, taassuma aamma siunnersuutigaa.

Politikerip taassuma oqaasii immikkut ilisimasallit marluk nunanut allanut tunngasunik Danmarkimi ilisimatusarfimmeersuusut (DIIS) pimoorussisukkiarivallaanngikkaluaraanniluunniit maluginiarnartippaat. Taakkua nunarput sakkutuulersornermi allanngortoqarnissaanut piareersartariaqarsoraat.

- Nunanut allanut tunngasuni ministerip oqarneragunarneratulli Donald Trumpip oqaasii pimoorussisukkiarinngikkaluarlugit tusarnaartariaqarpagut. Russit (sakkutuulersornermi, aaqq.) makitasaaleriaannaasut eqqumaffigisariaqarparput, Flemming Splidsboel oqarpoq.

Aamma Issittup pilerngunneqarnera Tunumi sakkutooqarfeqalerneranik kinguneqarataannaavoq.

Rusland makitasaartoq

Ruslandimiup politikerip oqaasii siullermik qularisariaqarput.

Naalagaaffeqatigiinneq, nunarsuarmioqatigiit isumannaatsuunerannik nunarsuarmillu isiginninneq pillugit ilisimatusartoq Ulrik Pram Gad taama isumaqarpoq.

- Oqarataarnerupput. Don Jr.-ip Fox Newsimut MAGA pillugu aamma taamaaliorneratut iliorpoq, soorlu Ruslandimi politikerit Putinimut isornartorsiutitaqanngitsumik nunagisamik pingaartitsillutik aamma oqaaseqartartut.

Pituffik Space Basemi radarip sorsuttoqalissagaluarpat aserornissaa Ruslandip nunatsinni sakkutuulersulersaarnerminut siunertatuarigaa, Ulrik Pram oqarpoq. Radarimi taanna russit qaartartunik igeriuttakkanik USA-mut igeriusseratarnissaannut nakkutilliissutaavoq. Assi © : DIIS

Sovjetunioniusimasumik ilisimatusartoq aamma DIIS-imeersuusoq Flemming Splidsboel isumaqataavoq.

- Kalaallit Nunaanni sapaatit akunnerata siuliani pisoq aalassatsiteqalunilu tupaallaataaqaaq; aamma russinut. Kalaallit Nunaata affaa tigualersaarnerarlugu maanna qisuariaqarput.

Ruslandili Issittumi sakkutuuliinerungaatsialeruttortoq kalaallillu politikerertaasa tamanna sianigilluinnartariaqaraat, immikkut ilisimasallit taakkua marluk oqarput.

Issittoq sakkulersorfiunngitsuusoq eqqaamassagipput, naalakkersuisut siulittaasuata Múte B. Egedep pingasunngornerup siuliani oqaatigaa.

Issittulli sakkulersorfiunngitsutut isigineqarunnaartariaqartoq, immikkut ilisimasallit taakkua isumaqarput.

- Sakkulersorfiunngitsuujunnaarpoq, ajoraluaqaaq. Pisoqaqaaq, tamakkualu ammasumik maanna oqallisaapput. Sakkutoorpassuit sungiusarput, aqqartartut atomitortut, umiarsuit sorsuutit timmisartunut mittarfiutigisut, timmisartut missilillu, Flemming Splidsboel oqarpoq.

- Ukiunimi kingullerni oqallisigineqarnerujartuinnarput. Issittup immikkuullarissutut, tassa sakkulersorfiunngitsutut isigineqarnera qaangiuttoq isumaqarpunga.

Rusland USA-lu piffissami aggersumi nalunaaruteqaqqissagunavittut, Flemming Splidsboel oqarpoq. Politikerertatsinnut tamatumunnga tunngatillugu ima siunnersuuteqarfigai: - Pimoorussisukkiarinaversaatsiarisigit. Nipingangiukkaanni pitsaanerussaqqooqaaq. Oqaaseqarfiginngikkaanni ilaannikkut pitsaanerusarpoq. Politikkikkulli pissutsit najummassimanarneruleriaannarnissaat sianigisariaqarpoq. Assi © : Lynggaardhansenfoto.dk

Ruslandip sorsunnerup nillertup nalaani sakkutooqarfigisimasami ilarpaalui ammaqqikkai, Ulrik Pram Gad oqarpoq.

Russit Issittumi nunami pisuussutitik uumaatsut pingaarnertut illersorniarlugit taamaaliorput.

Atortorussaarutinilli ineriartortitsineq pissutigalugu sakkutooqarfiit 1980-ikkunnut naleqqiullugit siooranarnerulersimapput.

- Sakkutuuliinerunerat imminut illersorniarneruvoq. Sakkutooqarfimmili ilaanniit, atortorissaarutiminnik ineriartortitsinertik saniatigut, Pituffik Space Basemut  saassussisinnaanerat ajornartorsiutaavoq, Ulrik Pram Gad oqarpoq.

Tunumi sakkutooqarfeqalerataannaasoq

Sorsunnermi qanoq iliornissamik pilersaarusiorfiusarpoq Ruslandillu taamaaliornissaa piffissanngortoq, politikeri Ruslandimiu tv-kkut ataasinngormat oqallinnermi oqarpoq.

Ruslandillu taamaaliornera USA-p Kalaallit Nunaannik ulluni makkunani soqutiginnilluinnarneranut pissutaaqataasunut ilaasoq, immikkut ilisimasallit marluullutik oqaatigaat.

Nunatta imartaatigoortunik Rusland atomitortunik aqqartartoqarpoq. Sorsuttoqalissagaluarpat, taakkua Tunu sinerlugu kujavarniassagunavipput.

- Taamaammat amerikamiut aqqartartunik Kalaallit Nunaata Islandillu Tuluit Nunaatalu akornanni (GIUK-Gap) imartaasigoortoqarneranik alapernaarsuinerujumallutik Tunumi amerlanerusunik radarilersersuerusullutilu ungasianiit aquttakkanik timmisartuaraleerusupput, Ulrik Pram Gad oqarpoq.

USA-p tamatumani kimigiisernera piumasariumagaanillu kalaallit qallunaallu politikerit piffissami aggersumi nakkaannarnaveersaarniapiloorsinnaapput.

- Maannamut pisut qiviaraanni, Kalaallit Nunaanni sakkutuuliinerusoqassagunavippoq. Taamaattoqarnissaata ingalanneqarsinnaanissaa takorloorsinnaanngivippara, Flemming Splidsboel oqarpoq.

- Trumpimummi siunnersortaasut politikkikkut anguniakkaminnik piviusunngortitsisoqarnissaa kimigiisiutigiinnavissussagunikku nakkaannarnaveersaarniapiloornartussaassaaq. Taamaaliornissaallu ernummatigaara.

Naalakkersuisut siulittaasuat Múte B. Egede USA-mi nutaarsiassaqartitsivimmit Fox Newsimit sisamanngornermi unnukkut apersorneqarami ima oqarpoq:

- Ilissi nunassi isumannaatsuunera uagut nunatta isumannaatsuuneraa. Nunani tamalaani pisut eqqarsaatigalugit Issittup illersorneqarnissaa pingaaruteqarneruleriartortoq ilisimavarput. Nunarput, nunarsi, Issittoq, Amerikami nunat, nunallu killiit qanoq illersorneqassanersut oqallisigineqarnissaannut ammavugut.