Tunumi qilalukkat tammartut
Tunumi ukiumi matumani qilalugartoqarpianngitsoorpoq Tasiilap avannaani qilalugarniartarfimmi qilalukkat tammakarsimammata, Sermiligaami ilinniartitsisoq soraarneq massakkullu piniartoq qilalugarniartartorlu Masanti Mikiki oqaluttuarpoq:
-Aasaq manna piisattorujussuuvoq, arlaqanngitsullu kisimik pisaqarput, tamanna ajorpoq. Ullut 28-it avannaaniikkaluarpugut pisaqanngitsoorlutali.
Sooq qilalugaqarpiannginnersoqapeqqutigaarput, akivoq:
-Naluara, kisianni tusarparput Ittoqqortoormiini pilissuusoq.Kangertitivaq-mi qilalukkat kujammukartartuugaluit avataani uuliaqarneranik misissuisut immap naqqanik sajuppillatsitsisarlutik- qaartitsisarlutik misissuinerannit qimaatinneqarsimanissaat ilimatsaappara.
Tasilaap avannaani Mikip Kangerlua ujarassiuut umiarsuaannit najorneqarpoq, umiarsuullu ekkolodia ikumatinneqartuarluni qilalukkanik qimaatitsisimanissaa naatsorsuutigini Masanti Miki oqarpoq.
Aputitiip kujataa qilalugaqarnerarpaat, taakkuli qaannamik tikikkuminaaqaat najugaat kassorpassuaqartarmat. Masanti Mikikip tusarsimavaa Kangertitivarmi taamallaat pingasunik sisamasanilluunniit aasaq manna qilalugartoqarsimasoq.
Sermiligaami ukioq manna qulit sinnilaaginnarlugit qilalugartoqarsimavoq.
Pinngortitaleriffimmi qilalukkanik ilisimatooq Lars Witting oqarpoq Tunup ilaani qilalukkat tammarsimanerat aatsaat tusaritsik, sumillu peqquteqarnissaa nalunarnerarpaa oqarlunili qilalukkat ukiumiit ukiumut arlaannik peqquteqarlutik tammakarsinnaasartut. Pinngortitaleriffimmiut Tunumi qilalugaqassutsimik aappaagumiit misissuilersinnaanissartik neriuutiginerarpaat.
