Tunumi Helheim-ip Sermiata misissuiffigineqarnera aningaasalersorneqalerpoq

Sermersuup misissuiffigineqarnera Tunumi sukkaniunnermit Siku Extreme Arctic Challenge-imit toqqaannanngikkaluamik tapersersorneqalerpoq.

Siku Extreme Arctic Challenge naatsunngorlugu SEAC-mik taaneqartarpoq.

Silap allanngoriartorneranut tunngatillugu aallakaatitassiortoqarniarpoq, sukkaniunnerullu nalaani filmiliortoqassalluni.

Sukkaniunnermut aningaasaliisut Siku Glacier Vodka silap allanngoriartorneranik misissuinermut peqataarusulluni nalunaarsimavoq.

Ammassallip eqqaani Helheim-ip Sermiani misissuisoqartussaavoq, tassanilu misissuinissaq aningaasaliiffiginiarneqarpoq.

Sermip ingerlaarnera ilisimatuunit assigiinngitsunit Meredith Nettles-imit Columbia University-meersumit aqunneqartumit misissuiffigineqarpoq, ukiullu pingasut maanna misissuisoqareerluni.

Sermeq pineqartoq akunnerit 24-t ingerlanerini 25 meterinik illuartarpq, nunarsuarmilu sukkanerpaanut ilaalluni.

Ilisimatuut sisamat tallimalluunniit ukiumut marloriarlutik Helheim-ip Sermianukartarput misissuiartorlutik.

Taannalu tassaavoq Siku Glacier Vodka-mit aningaasalersorniarneqartoq. SEAC-mik aaqqissueqataasut ilaat Anders Steenbakken taama oqarpoq.

- Sukkaniunnerup ilisimaneqalernerata saniatigut Kalaallit Nunaat silallu allanngoriartornerata kingunerisinnaasai nunarsuarmioqatitsinnit paasinarsisinneqassapput, Siku Glacier Vodkallu aningaasaliissutai tamatumunnga iluaqutaassaqaat, Anders Steenbakken oqarpoq.