Tunu Islandimiit pilersorneqaleriaannaavoq
Tamanna Nunat Avannarliit Killiit aggustimi ataatsimiinneranni oqallisigineqarpoq.
- Nerisassat peqqinnartut, soorlu naatitat, timmisartukkuinnaq ukiup annerpaani nunap immikkoortuanut tassunga apuunneqartarput. Taamaalilluni quleriaataa pallillugu akisunerusarlutik. Taamaammat allaanerusumik Royal Arctic Linemut pituttunngikkaluarluni, periarfissaqarnersoq naalakkersuisunut misissoqquarput, Nunat Avannarliit Killiit siunnersuisoqatigiiffianni siulittaasoq Josef Motzfeldt taama oqarpoq.
Tunu Islandiminngaanniit pilersorneqalissappat allanik aamma iluaquteqarsinnaasoq, Josef Motzfeldt oqarpoq.
- Iluatsissagaluarpat, nunatta avannarpiaanik pilersuineq misilittakkat aallaavigalugit allaanerusumik aaqqissuunneqarsinnaavoq, Josef Motzfeldt oqarpoq.
