Tunngaviusumik inatsit oqallisaaqqilerpoq

Inuit Ataqatigiit naalakkersuisullu siulittaasuata Hans Enoksenip inatsisartut ukiamut ataatsimiinnissaannut atatillugu nunap qanoq ittumik naalakkersorneqarneranut tunngatillugu tunngaviusumik inatsisittaarsinnaanissamut misissuiniarlutik atorniarpaat – taamaaliorniarneralli Dansk Folkepartimeersup Søren Espersenip atorsinnaannginnerarpaa, ministeriunerlu Anders Fogh Rasmussen suliamut akuliuteqqullugu.

Taamatut periuseqarluni alloriarneq nalinginnaasuunngilaq – ministeriunerlu peqqusimavara taamatut periuseqarneq tunngaviusumik inatsimmut assortuisuunnginnersoq misissoqqullugu.

Paragrafit 20 naapertorlugu Søren Espersenip ministeriunermut apeqquteqaateqaatini tallimat tunngavilersorpai.

Søren Espersen ministeriunermut apeqquteqarnera pissuteqarpoq, naalakkersuisut siulittaasuata Hans Enoksenip aggustip ulluisa arfineq pingajuanni ilaatigut oqarmat; – issuaaneq aallartippoq:

”Naggasiutigalugu nalunaarutigissavara Inatsisartut ukiaru ataatsimiinneranni Naalakkersuisut aalajangiiffigisassamik siunnersuuteqalersaarmata, Naalakkersuisut peqquneqassasut nunatsinni tunngaviusumik inatsisiliortoqarnissaanut isumalioqatigiissitarsuarmik pilersitsisoqarnissaa siunertaralugu piareersaalluni sulineq allarteqqullugu”. Issuaaneq naavoq.

Hans Enoksenip taamatut saqqummiussaqarnera Søren Espersenimit Dansk Folkepartipartiimeersoq tamanna tunngavigalugu ilaatigut imatut ministeriunermut apeqquteqarpoq; Siullermik:

Ministeriunerup qanoq isumaqarpa, Kalaallit Naalakkersuisuisa, siulittaasuat Hans Enoksen siuttoralugu – Kalaallit Nunaata naalagaaffittut tunngaviusumik inatsisissaanut siunnersuut naalakkersuisut suliaralugu aallartissimammassuk?

Tulliatut:

Ministeriunerup tunngaviusumik inatsimmut naapertuuttuusorinerlugu, kalaallit namminerisaminnik tunngaviusumik inatsisitaarnissaannut atatillugu suleqatigiissitarsuamik ukiaru inatsisartut ataatsimiilerapata Kalaallit Nunaanni naalakkersuisut pilersitsiniarlutik siunnersuusiormata

Kiisalu pingajuattut:

Danskit naalakkersuisuisa paasisimanerlugu Kalaallit Nunaanni naalakkersuisut Kalaallit Nunaata Danmarkimik naalagaaffeqateqarnerat kipitinniarmassuk, kiisalu kalaallit nammineq tunngaviusumik inatsisitaarniarlutik siunniussisimappata Danmarkimi naalakkersuisut

qanormita iliuuseqarniarpat?

Søren Espersen, Kalaallit Nunaata Radioanit, apersorneqarluni aamma oqarpoq Kalaallit tunngaviusumik inatsisiliorniarnerat Danskit naalagaaffiata tunngaviusumik inatsisaanut akerliusoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat