Tunngaviusumik inatsisiliortunik pilersitseqqusivoq

Ukiut 2007 2008-llu nikinnerat aallarnerfigalugu ukiut tallimat qaangiutsinnagit Kalaallit Nunaanni namminiilivinnissamut atatillugu tunngaviusumik inatsimmik siunnersuut saqqummiunneqassasoq Johan Lund Olsen Inuit Ataqatigiinneersoq Sermitsiamut oqarpoq.

Tunngaviusumik inatsisissamut kommissionimik naalakkersuisut pilersitsisariaqarput.

Tunngaviusumik inatsimmik pilersitsiniarnermi inuiaqatigiit tamarmik peqataatinneqartariaqartut IA isumaqarpoq. Soorlu nunaqarfimmiut isorliunerusormiullu aamma peqataatinneqassapput.

Aamma kommissioni pisinnaatinneqassaaq, inatitsit pillugit ilisimatuunik ikiortittassalluni.

- Tunngaviusumik inatsisissarput, tassaasariaqarpoq avammut namminerlu nunagisamut inuiaqatigiit kinaassusaanik malunnartitsisoq.

Taamaasilluni nunap allap tunngaviusumik inatsisaa atunngikkaluarlugu, nunarsuarmi Kalaallit inuiatut isigineqarsinnaalissapput, Johan Lund Olsen tunngavilersuinermini taama oqarpoq