Tunngaveqanngitsumik pasilliisutut unnerluutigaa

Professor Gorm Wintherip nikanarsarneqarsimasutut misigaluni Ilisimatusarfimmi lektoriusimasoq, Pia Vedel Ankersen, tunngaveqanngitsumik pasilliinikkut ajuallatsitsisimasutut unnerluutigaa. Sermitsiami tamanna allaaserineqarpoq.

Gorm Winther suleqatigiit iluanni allakkiami marloriarluni kanngunarsarneqarsimasutut misigisimavoq. Allakkiaq taanna Ilisimatusarfimmi rektorimit kaammattorneqarnermigut Pia Vedel Ankersenip allagaraa. Allakkiami ilaatigut Gorm Winther marxisme tunngavigalugu atuartitsisartutut aamma professoritut atorfimmut piukkunnanngitsoq allassimavoq.

Allakkiaq Sermiatsiami aamma issuarneqarpoq. Taamaattorli Gorm Wintherip aviisip unnerluutiginissaa pilersaarutiginngikkallarpaa:

- Pia Vedel Ankersenip oqaatigisani utertinngippagit, aallaqqaatigalugu unnerluutiginiarpara, Gorm Winther Sermitsiamut oqarpoq.

Tamakkua pisut tamarmik aallartipput, Pia Vedel Ankersenip soraartussanngornera ilinniartunit arlalinnit naammagittaalliuutigineqarmat. Tamatuma kingornagut rektorip Pia Vedel Ankersen allakkioqqullugu qinnuigaa.

Allakkiaq perulluliuutaaqaaq: Ilisimatusarfimmi ilinniartitsisut tusagassiuutitigut ammasumik imminnut isornartorsioqattaapput, naggataatigullu eqqissisimasoqarnissaa anguniarlugu Ilisimatusarfiup aqunneqarnera rektor Tine Parsip isumagisarilerpaa.

Gorm Winther aamma Pia Vedel Ankersen tamarmik Ilisimatusarfimmi atorfeqarunnaareerput. Allaffissornermullu instituti Ilisimatusarfiup aaqqissuuteqqinneqarneranut atatillugu atorunnaareerpoq - tamatumunngalu inuit ataasiakkaat aaqqiagiinnginnerat pissutaanngitsoq oqaatigineqarpoq.