Paamiuni saattualeriffik Tunitsivik Paamiut A/S namminersortunit ukiuni qulingiluani ingerlanneqareerluni akiliisinnaajunnaarluni aggustip 31-ianni matuvoq. Tunitsiviup matusariaqalernera suliassakillinermit pissuteqartoq piginnittoq Arvid Buhrkal oqarpoq.
- Unammillerneqarnerput Naalakkersuisullu saattuartassiissutinik ikilisaanerat nammassinnaasimanngilarput, aallaqqaammut saattuartat unammilleqatigiilluta suliarisinnaasimavagut pisassiissutilli ikilineqarnerat matusariaqarnitsinnut pissutaanerpaavoq, Arvid Buhrkal oqarpoq.
Paamiuni Tunitsivik ingerlalluarallarami 47-inik sulisoqarsimasoq, 8 - 9 millioni koruunit akornanni amigartooruteqareerluni matuvoq.
Tunitsiviup siunissami ammaqqissinnaanissaa naatsorsuutigineqarsinnaanngitsoq Arvid Buhrkal oqarpoq.
- Ukiut tamaasa tunisassiornissamut piginnaatitsissutinik qinnuteqartariaqartarsimanerput assut kipiluttunartarsimavoq, tunisassiornissamut piginnaatitsissut kingusissorujussuakkut aatsaat tunniunneqartarmat, taamatut ingerlasoqartillugu nutaamik aallartitsinissamut qularnaveeqqusiisoqarusuttoqarnissaa taamaattumik naatsorsuutigineqarsinnaanngilaq, Arvid Buhrkal oqarpoq.