Tunitsiviit pillugit Maniitsumi isumasioqatigiittut
Qeqqata Kommuniani siunissami aalisakkanik piniakkanillu tunitsiveqarnikkut periarfissat eqqartorneqarput.
Peqataasut borgmester Hermann Berthelsenimit ippassaq tikilluaqquneqarput. Aalisarnermut, Piniarnermut Nunalerinermullu Naalakkersuisoq Finn Karlsen politikkikkut anguniakkat pillugit saqqummiivoq. Kommunimi aalisarnermut piniarnermillu tunngatillugu kisitsisitigut paasissutissanik saqqummiussisoqarpoq Pinngortitaleriffimmiillu uumasunik ilisimatuut siunnersuisarnerat aalisarneqarsinnaasullu nutaat pillugit oqalugiartoqarluni.
Illoqarfinni nunaqarfinnilu tunitsiveqarnikkut periarfissat pillugit aalisartut peqatigiiffii assigiinngitsut saqqummiussaqarput, Royal Greenland Maniitsumi Sisimiuni tunitsiviit pillugit paasissutissiilluni Lilleholm ApS-ilu tunitsiviutini pillugu naatsumik aamma saqqummilluni.
Aalisarnermut tapiissutit angallatigissaanerlu pillugit Naalakkersuisoqarfimmit ullaaq manna oqalugiartoqarpoq. Kingusinnerusukkut kalaalimineerniarfiit eqqartorneqassapput ualimullu nunap timaani motoorilinnik atuineq eqqartoqasalluni.
