Tunisisinnaaneq qulakkeerneqaraluartoq puisit amiisa akii apparneqarput
Puisip amiata ataatsip akiata 70 koruuninik apparlugu 310 koruuninit 240 koruuneqalersinnera Great Greenlandimut tunisinermi qulakkeerinnissutaasoq. Ane Hansenip aamma erseqqissaatigaa.
Naak ammerivik nammineq ukiut marluk kingulliit tuniniaanermini ajutoorluinnaraluarluni nammineerluni akiliisinnaanermut periarfissaqarsimanngilaq.
- Great Greenland Kopenhagen Fur-imi akitsorterussinermi amermik 2008-mi 2009-miluunniit tunisaqarsinnaanngilaq, tamannalu ammeriviup aningaasaqarniarneranut ajorluinnartumik kinguneqarpoq, sullissinissamummi isumaqatigiissutip ilusilersorneqarneranut atatillugu amernik ataavartumik tunioraanissaq apeqqutaasimavoq, Ane Hansen nassuiaavoq.
KNAPK tamatigut aalisarnermut piniarnermullu tunngasunik taakkununngalu attuumassuteqartunik Aalisarnermut, Piniarnermut Nunalerinarmullu Naalakkersuisoqarfimmit tusarniaaffigineqareerneratigut akinik appaaneq aalajangiunneqarsimavoq, tamannalu pisinnaasimavoq avannaani illoqarfinni nunaqarfinnilu innuttaasunik ataatsimiititsinerup kingorna.
- Aalisartut piniartullu allatigut aningaasarsiorsinnaanissaat pillugu suliaq maanna ingerlavoq, tassungalu atatillugu mitit qiviuinik katersuinissamut suliaqartitsineq aammalu avataannit aqunneqartumit eqalussuit pillugit misileraanerit siorna suliarineqalermata, Ane Hansen Jakob Skademut akissuteqaammini ilaatigut tunngavilersuivoq.