Tunisassiorfiit siunissaat ataatsimiititaliap aalajangissavaa
- Tunisassiorfinnik nunaqarfinni ingerlatsisut taakku marluk oqaloqatigineqarnerit aallartippavut massukkumullu ingerlanneqarlutik. Naalakkersuisoqarfiit arlallit peqataatinneqarput. Januaarip naanerata missaani paasissutissat kisitsisillu qulaajarsimanissaat naatsorsuutigaarput, Naalakkersuisut siulittaasuat Hans Enoksen oqarpoq.
Matusinnginnissaq sapinngisamik naalakkersuisunit anguniarneqartoq aamma oqaatigaa.
- Neriuppunga naalakkersuisuinnaanngitsut aammali partiit tamarmik peqataallutik ikiuutissasut. Tassa inuit nunaqarfinni nammineernerullutik napatinnissaat pingaartikkatsigu, Hans Enoksen oqarpoq.
Tunisassiorfiit immikkut aningaasaliiffigineqarnissamik pisariaqartitsisut naalakkersuisut takusinnaareeraat aamma oqaatigaa. Aningaasaliisoqassanersoq Inatsisartut Aningaasaqarnermut ataatsimiititaliaata aalajangerumaaraa, Hans Enoksen naggasiivoq.
